येँ– नेवाः देय् दबुलिं थःगु स्थापना दिवसया झ्वलय् बिया वयाच्वंगु स्वंगू सिरपाः त्याकूपिनि नां पितब्यूगु दु। थुगसीया नारायणदेवी-तीर्थ व्यवसायी प्रोत्साहन सिरपाः नेपालमण्डल टेलिभिजनयात बीगु निर्णय जूगु धकाः देय् दबुलिं धाःगु दु।
अथे हे नारायणदेवी तीर्थ नेवाः समाजसेवा सिरपाः डा. महेशमान श्रेष्ठ व नेवाः समाज भरतपुर चितवन, गिरिधरलाल नेपालभाषा सेवा सिरपाः नेपाल लिपि गुथि व प्रा. डा. प्रेमशान्ति तुलाधरयात बीगु निर्णय याःगु दु।
देय् दबूया सिरपाः समितिया निर्णायक समितिया वंगु गुंलागाः चौथि, आइतबार (भदौ १७ गते) च्वंगु मुंज्यां छगू छगू लख तकाया उगु स्वंगुलिं सिरपाः नेपालमण्डल टेलिभिजन, डा. महेशमान श्रेष्ठ व नेवाः समाज भरतपुर चितवन, नेपाल लिपि गुथि व प्रा डा प्रेमशान्ति तुलाधरयात बीगु निर्णय याःगु खः।
स्वंगुलिं सिरपाः नेवा: देय् दबूया २९ क्वःगु स्थापना दिवसया ज्याझ्वलय् वइगु यंलाथ्वः सप्तमि, सुक्रबार (असोज ५ गते) बीगु धकाः देय् दबुलिं धाःगु दु ।
थ्वया न्हय् देय् दबुलिइ थी थी सिरपाःया निंतिं सिफारिस व दाबी यायेत निवेदन आह्वान याःगु खः।
