येँ– नेवाः देय् दबुलिइ थःगु बुन्हिया झ्वलय् लःल्हाइगु थी थी सिरपाःया निंतिं सिफारिस व दाबी यायेत निवेदन आह्वान याःगु दु। थी थी सिरपायाः निंतिं सिफारिस व दाबी यायेत थी थी खलःपुचः, संघ संस्थालिसें व्यक्तियात निवेदन बीत देय् दबुलिं आह्वान याःगु खः।
देय् दबुलिं बुन्हिया झ्वलय् छगू , छगू लख तकाया नारायण देवी तीर्थ नेवाः समाजसेवा सिरपाः, नारायणदेवी तीर्थ व्यवसायी प्रोत्साहन सिरपाः व गिरिधरलाल नेपालभाषा सेवा सिरपाः यानाः स्वंगू सिरपाः बिया वयाच्वंगु दु। थुपिं सिरपाःया सिफारिस व दाबी वइगु गुंलाथ्वः एकादसि, आइतबार (भदौ १० गते) तक यायेफइगु खँ देय् दबुलिं धाःगु दु।
नेवाः सामाजिक, संस्कृति, अधिकार, सम्पदा, संरक्षण, परम्परागत व्यवसाय, साहित्य लगायतया लागाय् च्वछाये बहःगु योगदान याःपिं व्यक्ति वा संघ संस्थायात सिफारिस यायेफइगु धकाः देय् दबुलिं धाःगु दु।
थुपिं सिरपाः नेवाः देय् दबूया २१ क्वःगु बुन्हिया झ्वलय् वइगु यंलाथ्वः सप्तमि, सुक्रबार (असोज ५ गते) जुइगु ज्याझ्वलय् लःल्हाइ ।
