यल -नेवाः परम्परागत बाजं, भजनया संरक्षणया निंतिं थुथाय् ल्याय्म्ह पुस्ता न्ह्यज्याना च्वंगु दु । थुकिया छगू दसिकथं यलया जलदेय्यात काये फु ।
ऐतिहासिक, सांस्कृतिक व परम्परागत रूपं महत्वं जाःगु यलया हरिसिद्धि जलदेसय् ल्याय्म्ह पुस्ता न्ह्यज्यानाः परम्परागत दाफा भजनलिसें बाँसुरी बाजं स्यनेगु ज्या जूगु दु । दाफा भजनलिसें बाँसुरी बाजंया प्रशिक्षण स्वलातक जूगु खःसा वंगु ने.सं. ११४४ थिंलाथ्वः चौथि, सनिबार (मंसिर ३०) व पन्चमि, आइतबार (पौष १ गते)खुन्हु दाफा भजनलिसें बाँसुरी बाजं पिदंगु खः ।
तालिम सुरु यायेन्ह्यः किसली तयाः नासः पुजा याःगु खःसा दाफा भजनलिसें बाँसुरी बाजं पिदने न्ह्यः नं थथे हे किसली तयाः नासः पुजा लिसें गनेद्यःया पुजा याःगु खः। अथे हे लाछिया नासः द्यः, गनेद्यः व लाछिइ भजन हालाः बाजं पिदंगु खः। जलदेय्या मिकु मंकाः बाजं खलः, कँय्था दाफा खलः, क्वंखिं दाफा खलः व बुइना दाफा खलः यानाः मुक्कं ४ गू पुचःया ८० म्हसिनं खिं, बाँसुरी बाजंलिसें दाफा भजनया तालिम काःगु खः।
बाजं पिदंगु न्हिखुन्हु गुरुपिन्त ब्यतालिं चिकाः हंगु खः । यःमरि पुन्हिधुंकाः छेँजःपाखें गुरुपिन्त व सयेकूपिन्त सगं बियाः क्वचायेकेगु ज्याझ्वः दु ।
