येँ– नेपालभाषाया काव्यय् न्हूपिं च्वमिपिनिगु उत्थान यानाः काव्य गुकथं स्तरिय यानावनेगु धैगु खँयात विशेष महत्व बियाः कविताया बैचारिक गोष्ठी जूगु दु। गोष्ठि ने.सं. ११४३ कौलागाः सप्तमि, सनिबार (कात्तिक १८, २०८०)खुन्हु नेपाः बांक्वेट, खुसिबुँइ जूगु खः ।
कविताया लाय्कू संस्थाया नायः डा.ज्योति प्रभा तुलाधरया सभानायःसुइ जूगु ज्याझ्वलय् भाषासेवि स्वयम्भू धर तुलाधरं पिथना दीगु कविताया लाय्कू सफू जनकवि दुर्गालाल श्रेष्ठ, वरिष्ठ साहित्यकार डा. योगेन्द्रमान प्रधान, डा. पुष्पराज राजकर्णिकार, च्वसापासाया नायः भूषण प्रसाद श्रेष्ठ, कवयित्री प्रतिसरा साय्मिपिन्सं मंकाःकथं पितब्वज्या यानादीगु खः ।
ज्याझ्वलय् ज्याझ्वःया मूपाहां जनकवि दुर्गालाल श्रेष्ठ व सभाया सभानायः डा. ज्योति प्रभा तुलाधरं थःथःगु नुगःखँ प्वंकादीगु खः । ज्याझ्वः कविताया लाय्कू संस्थाया छ्यान्जे रजनि मिलां न्ह्याकादीगु खःसा वरिष्ठ न्वकू हिसिलिना शाक्यं लसकुस न्वचू , न्वकू विनिता बज्राचार्यं सुभाय् न्वचू बियादीगु खः।
ज्याझ्वःया लिपांगु सत्रय् थी थी नेपालभाषा साहित्यिक व्यक्तित्वपिन्सं कार्यपत्र न्ह्यब्वयादीगु खः । डा. पुष्पराज राजकर्णिकारं न्ह्याकादीगु लिपांगु सत्रय् डा. ज्योतिप्रभा तुलाधरं “कविताय् आधुनिकता व आधुनिकत्व– अन्तर्राष्ट्रिय दृष्टिकोण“, नेपालभाषा केन्द्रीय विभागया प्रमुख डा. राजनलाल जोशिं “नेपालभाषा कविताया वर्तमान स्थिति “ शीर्षकया कार्यपत्र न्ह्यब्वया दीगु खः । अथे हे सम्पादकलिसें कवि सुरेश किरण मानन्धरं “कविता विधाय् वैच्वंगु पंगः“, कवि रजनि मिलां “कविपिंसं आः ज्वनेमाःगु लँपु “ शीर्षकया कार्यपत्र न्ह्यब्वया दीगु खः । ज्याझ्वःया लिपतय् गोष्ठी पिदंगु थी थी पक्षयात कःघानाः उपन्यासकार मल्ल के.सुन्दरं निस्कर्ष कनादीगु खः ।
ज्याझ्वलय् मिनर्वा शर्मां नेपाःया ऐतिहासिक वज्रयोगिनी प्याखं न्ह्यब्वया दीगु खःसा खुम्ह कविपिन्सं थःथःगु चिनाखँ नं ब्वनाः न्यंकादीगु खः ।
