येँ – न्यागःमणि फेदि मानन्धर गुथिइ थःगु ख्यलय् न्ह्यथनेबहःगु व मूवंगु ज्याखँ यानादीपिं मानन्धर समुदायदुनेयापिं थीथी व्यक्तित्वतय्त हगु दु। ऐतिहासिक व नांजाःगु न्यागमणि फेदिइ वंगु ने.सं. ११४४ प्वहेलाथ्वः दसमि¸ सनिबार (माघ ६ गते)खुन्हु जूगु ज्याझ्वलय् वय्कपिन्त हगु खः।
ज्याझ्वलय् गुथिया संस्थापक सल्लाहकार रामभक्त मानन्धर व लक्ष्मीदास मानन्धर, नेपाली सेनाया प्रमुख सेनानी (लेफ्टिनेन्ट कर्नेल) डा. प्रदिप मानन्धर, प्राइम कमर्सियल बैंकया प्रमुख कार्यकारी अधिकृत संजीव मानन्धर, धाःबाजं गुरु पुष्प लाल मानन्धर, नेपालभाषा ख्यलय् मतापं थःगु हे कथं थी थी ज्याखँ यानावं च्वनादीम्ह पौभाः साय्मियात दसि–पौया लिसें खेँय् सगं बियाः हंगु खः । अथेहे ने.सं. ११४३ (वि.सं. २०७९) दँया एसइइ जाँचय् धिसिलाक्क ताःलाना दीपिं गुथिया मस्तय्त नं दां सिरपाःया लिसें दसिपौ लःल्हागु खः ।
ज्याझ्वलय् गुथिया कजि पद्मलाल मानन्धर, न्वकू लक्ष्मी नारायण मानन्धर लगायतं गुथिया थी थी ज्याखँया बारे थःथःपिनि नुगःखँ तयादीगु खः। अथेहे हनेज्या जूपिं प्रदिप मानन्धर, संजीव मानन्धर व पौभाः साय्मिपिन्सं नं थःथःपिनि नुगःखँ तयादीगु खः । ज्याझ्वलय् धाःबाजं थानाः ब्वज्या नं याःगु खः ।
