येँ – सक्वय् कन्हय्निसें नेपाल शिरोमणि म्हासुख्वाः माजु बज्रयोगिनीद्यःया जात्रा न्ह्याइगु जूगु दु। ८ न्हुतक जुइगु जात्राया झ्वलय् गुँबहालय् च्वंम्ह म्हासुख्वाः माजुया लुँया जलप तया:तःगु मूर्ति, सिंहिनी, व्याधिनी व चीभाः द्यः यानाः ४ गू मूर्ति २ किमी क्वय् सक्वदेशय् हयाः जात्रा याइगु चलन दु ।
कन्हय् पुन्हिखुन्हु म्हासुख्वाः माजु लिसें चीभाः द्यः, सिंहिनी, व्याघ्रिनी लगायतया द्यःपिन्त रथय् बिज्याकी। दँय् दसं सक्वय् निगू निगू त्वालं पाः कयाः जात्रा संचालन याइगु चलन दु। थुगुसी सुनटोल व इपाटोलया पाःकथं सुनत्वालय् दुगु द्यः छेँय् द्यःयात दुकाइ।
मूल-जात्रा वइगु ने.सं. ११४३ चौलागाः तृतिया, आइतबार (चैत्र २६ गते) लाःगु दुसा चौलागाः अस्तमि, बसुबार (30 गते) द्यःयात रथय् बिज्याकाः कन्हय्खुन्हु चौलागाः नःमि, सुक्रबार (बैशाख १ गते) सक्वया कोलागालय् जात्रा यानाः द्यःयात थाहां बिज्याकाः थुगुसीया जात्रा क्वचाइ ।
बज्रयोगिनी जात्राया निंतिं मल्लकालय् जुजु थः हे सवारी जुइगु प्रचलन दुगु खः । युद्धया स्थितिइ दुगुलिं अन्तिम मल्ल जुजु जयप्रकाश मल्ल थःगु पलेसा राजखड्गयात हे थःगु प्रतिनिधि कथं छ्वःगुलिं आःतक नं सक्वय् येँय्नं राज खड्ग हयाः जात्रा न्ह्याकीगु परम्परा दु।
३००० दँति न्ह्यः सक्वदेय्या जुजु शङ्खदेवं थःगु राज्य अन्तर्गतया ७ गू गामय् सुखशान्ति जुइमा, कल्याण जुइमा व बुँज्या बांलायेमा धकाः थ्व जात्रा न्ह्याकूगु खः।
