नेपाः पासा पुचः अमेरिकाय्या ग्वसालय् १३ क्वःगु इहि ज्याझ्वः क्वचाःगु दु । इहि संस्कारया ज्याखँ वंगु सनिबार मेरिल्यान्ड राज्यया पोटोम्याकय् च्वंगु हरेकृष्ण देगलय् क्वचाःगु खः । थुगु दँय् अमेरिकाया ८ गू राज्य व क्यानडाया ३१ म्ह मिसा मस्तय्सं इहि ज्याझ्वलय् ब्वति काःगु खः ।
पासा पुचःया नीस्वना नायः राम मालाकारपाखें न्हापां पुजा न्ह्याकादियाः इहि ज्याझ्वः न्ह्याःगु खः । न्हापांया पुजाधुंकाः मिसा मस्तय्त माथुरी श्रेष्ठ, सरोज प्रजापति, रीता सिंह, मगन श्रेष्ठ, लक्ष्मी रञ्जित, रोशनी गोर्खाली, दीपा राजकर्णिकार, नीति सँय्जु, सुचिता श्रेष्ठ ताम्राकार, बनिता तमोत, शीला श्रेष्ठ, शान्ति श्रेष्ठ व अञ्जली श्रेष्ठपिनि पुचलं विधिवत कथं मन्दलय् दुतिना दीगु खःसा मन्दलय् दुतिनेगु झ्वलय् सन्ध्या महर्जन व कृष्ण प्रजापतिइ परम्परागत धिमे बाजं थानादीगु खः ।
इहि ज्याझ्वलय् पासा पुचःया नायः मनोहर श्रेष्ठं दुथ्याःपिं मिसामस्त, इमि मांबाैपिन्त लसकुस यानादिसे नेवाः संस्कृति व समुदायस इहिया महत्वया खँ ध्वाथुइका दीगु खः । वय्कलं पासा पुचः नेवाः संस्कृति व थुकिया छ्यलाबुला, अभ्यासया लिसें थुकियात च्वन्ह्याकेगु व संरक्षणया ज्याय् दुबिनाः न्ह्यःने दनाच्वंगु अमेरिकाया नेवाः संस्था जूगु खँ कनादिल ।
नेवाः पुजारि बासव राजोपाध्यायं शुद्धिकरण पुजा, मन्दः पुजा, सिन्दुरोहण, कन्यादान, मन्दः चाःहिकेगु, कुमार पुजा, कुमारी पुजा, बाह्रां छुइगु, थाय्भु नकेगु, अभिषेक, आशिर्वाद, जल प्रसाद लिसेंया थी थी इहिया ज्याखँत सुथांलाक्क न्ह्याकादीगु खः ।
ज्याझ्वलय् राजु जोशी, एलन महर्जन, सुमन तुलाधर, प्रवीण ताम्राकार, पञ्च श्रेष्ठ, विनेश महर्जन, निश्चल प्रधान, अवन्तिका श्रेष्ठ, समृद्धि श्रेष्ठ, देव महर्जन, रत्ना डंगोल, हिना बज्राचार्य, किट्टी सुनुवारपिनि लिसें पासा पुचःया ज्यासना पुचःया दुजः, सल्लाहकार, संरक्षक, जिवंकाःछि दुजः, स्वयंसेवकपिन्सं ग्वाहालि यानादीगु खः ।
कन्यादानया हे छगू विधिकथं कयातःगु इहि नेवाः समुदायया मेमेगु यक्वं संस्कार मध्यय् छगू तसकं महत्वपूर्ण संस्कार खः । थुगु संस्कारकथं कन्याकुमारीयात सुवर्ण कुमारलिसे छुमांकथं इहि यानाबीगु परम्परा दु । इहि ज्याखँ न्हि लगन चूलाकाः यायेमाःगु मान्यता दु । अप्वः धया थें विजोर उमेर (५, ७, ९, ११) दयेकाः नेवाः मिसा मस्तय्त इहि याइ । नेवाःत त्वःताः नेपाःया मेमेगु समाजय् इहि यायेगु चलन मदु ।
थःपिनि समुदायया दुजःतय् अप्वःया वनाच्वंगु मांगयात ध्यानय् तयाः दँपत्तिं पासा पुचलं इहि ज्याझ्वःया ग्वसाः ग्वयावयाच्वंगु दु ।
