नेपाल संवत् आन्दोलनया प्रणेता लिसें नेवाः न्ह्यलुवाः मानवअधिकारवादी नेता, राजनीतिज्ञ पद्मरत्न तुलाधरया हुलाक टिकट नेपाल सरकारं पिकाःगुलिं नेपाल संवत न्हूदँ समारोह समिति ११४३ नं सुभाय् द्यछाःगु दु । समारोह समितिया नायः डा. नरेशमान बज्राचार्यं थौं बिहिबार पितब्यूगु प्रेस विज्ञप्तिइ थथे नेपाल सरकारयात सुभाय् द्यछानाःदीगु खः ।
प्रेस विज्ञप्तिइ नेपाल सरकारं नेपाःया ज्वःमदुम्ह छम्ह व्यक्तित्व पद्मरत्न तुलाधरया हुलाक टिकट पिथनाः याःगु सम्मानयात न्हूदँ समारोह समितिं दुग्यंक सुभाय् द्यछाना धकाः न्ह्यथँसे वय्कः नेपाल संवत आन्दोलनया प्रणेता जूगु धासें नेपाल सरकारपाखें नेपाल संवतया आन्दोलनया मागयात नं उकथं हे पूवंकीगु भलसा नं न्ह्यथनातःगु दु ।
वंगु दिल्लाथ्वः दुतिया, मंगलबार (असार ५ गते) नेपाल सरकारं नेवाः न्ह्यलुवा तुलाधरलिसें थी थी व्यक्तिपिनिगु झितका वंगु हुलाक टिकट पिथंगु खः । हुलाक सेवा विभागया ग्वसालय् जूगु ज्याझ्वलय् संचारमन्त्री रेखा शर्मां उगु टिकटय् टाँचा तयादीगु खः ।
