ऐतिहासिक लिसें पर्यटकीय बौद्ध सम्पदा काभ्रेया नमरा अर्थात् नमोबुद्धयात विश्व सम्पदा धलखय् दुथ्याकेगु झ्वलय् अन दुगु पुलांगु चैत्य हे पंक न्ह्यःने मत च्याकेत दयेकातःगु न्हूगु संरचना थुनाब्यूगु दु।
तःदँ न्ह्यःनिसें नमरा चैत्यपंक दयेकातःगु टहरा थुज्वःगु संरचना थुनेमाःगु माग नमराया च्यूताः काइपिं सकस्यां याना वयाच्वंगु खःसा म्हिगः बसुबारनिसें पुरातत्व विभाग अन्तर्गतया संरक्षित स्मारक तथा दरवार हेरचाह अड्डाया रोहवरय् थुनेगु ज्या न्ह्याकूगु खः। उकिया निंतिं नमोबुद्ध नगरपालिकाया जनप्रतिनिधिलिसें कर्मचारीपिं, प्रहरी, नमोबुद्ध घ्यांग गुथि व्यवस्थापन समितिया प्रतिनिधिपिं न्ह्यःने च्वंगु खः।
आः नमरा लागायात विश्व सम्पदा धलखय् दुथ्याकेगु लिसें अन थ्यंकेत त्वाथः, पःखाः, निगू ध्वाखा, लँय् मत लिसें ल्वहं लायेगु, चःबि दयेकेगु, सीसी क्यामेरा तयेगु थें जाःगु ज्या यायेत चय्न्हय्गू करोड तका नं फ्यायेधुंकूगु दु ।
