येँया शंखरापुर नगरपालिकां वइगु आर्थिक दँ २०८०/०८१ या निंतिं १ अर्ब १७ करोड ५८ लख २२ द्वःया बजेट हःगु दु । वंगु बसुबार इन्द्रायणिइ जूगु नगरपालिकाया गुक्वःगु नगरसभां उगु बजेट सर्वसहमतिं पारित याःगु खः ।
चालु खर्चपाखे ४८ करोड, ५१ लख, ६८ द्वः ६८७ तका अथे धयागु ४१.४ प्रतिशत व पूँजिगत खर्चपाखे ६८ करोड, ८१ लख, ५३ द्वः ३५३ तका अथे धयागु ५८.६५ प्रतिशत व वित्तीय व्यवस्थापाखे २५ लख तका अथे धयागु ०.२१ प्रतिशत यानाः १ अर्ब १७ करोड ५८ लख २२ द्वः तकाया बजेट फ्याःगु खः ।
थुगु बजेटय् संघीय व प्रदेश सरकारपाखें वित्तीय हस्तान्तरणं दुत वइगु सामाजिक सुरक्षा बापतया ध्यबा धाःसा दुथ्याका तःगु मदु । नगरपालिकाया वइगु आर्थिक दँया ब्याक्क आम्दानि मध्यय् आन्तरिक स्रोतं २० करोड १२ लख तका, राजस्व छ्याय्फ्वाय्पाखें ५३ करोड ४० लख ९ द्वः व अन्तर सरकारी वित्तीय हस्तान्तरणपाखें ४४ करोड १ लख १३ द्वः वइगु अनुमान याःगु दु ।
अथे हे शंखरापुर नगरपालिकाया ९ गू वडायात ५०, ५० लखया ल्याखं ब्याक्क ४ करोड ५० लख तका बजेट फ्याःगु दु । ब्याक्क विनियोजित बजेटया २१ प्रतिशत ध्यबा अथे धयागु २४ करोड ६९ लख २२ द्वः ६ सः व २० तका फ्याःगु दु । सामाजिक विकासपाखे ब्याक्क विनियोजित बजेटया २५ प्रतिशत अथे धयागु २९ करोड ३९ लख ५५ द्वः ५ सः तका फ्याःगु दु ।
अथे हे पूर्वाधार विकासपाखे ३५ प्रतिशत अथे धयागु ४१ करोड १५ लख ३७ द्वः ७ सः तका फ्याःगु दु । वातावरण व विपद् व्यवस्थापनपाखे ब्याक्क विनियोजित बजेटया १० प्रतिशत अथे धयागु ११ करोड ७५ लख ८२ द्वः २ सः तका फ्याःगु दु । सुशासन व संस्थागत विकासपाखे ब्याक्क बजेटया ९ प्रतिशत अथे धयागु १० करोड ५८ लख २३ द्वः ९ सः व ८० तका फ्याःगु दु ।
नगरसभाय् नगरप्रमुख रमेश नापितं वइगु आर्थिक दँया नीति व ज्याझ्वः न्ह्यब्वया दीगु खःसा उपप्रमुख समिता श्रेष्ठं बजेट विवरण न्ह्यब्वया दीगु खः ।
नगरसभां वइगु आर्थिक दँया निंतिं न्ह्यब्वःगु नीति व ज्याझ्वः, बजेट, न्यायिक समितिया प्रतिवेदन, वइगु आर्थिक दँया सेवा व ज्याया निंतिं स्थानीय सञ्चितकोषपाखें छुं भचा ध्यबा खर्च यायेगु व विजियोजन यायेगु खँय् व्यवस्था यायेत दयेकूगु विधेयक, सुशासन समितिया प्रतिवेदन, आर्थिक विधेयक २०८०, राजस्व परामर्श २०८० सर्वसहमतिं पारित याःगु खः ।
