नेपालभाषाया नांजाःगु पत्रिका ‘देसय् मरु झ्याः’या सम्पादक व प्रकाशक प्रदीपमान श्रेष्ठ मत्यवं मन्त । वय्कः ६७ दँया बैंसय् वंगु आइतबार मदुगु खः ।
आइतबार सनिइलय् थःगु हे छेँ, येँया मरुइ आकाझाकां स्वाहानें कुतुं वनाः घाःपाः जूगु व वासः यायेत अस्पतालय् यंकु यंकुं हे वय्कः मदुगु धकाः छेँजःपिन्सं धयादीगु दु ।
श्रेष्ठया अन्तिम संस्कार आइतबार हे बहनी पशुपतिइ जुइधुंकूगु दु ।
वय्कः नेपालभाषाया वाःपौ राजमतिइ प्रधान सम्पादक जुयाः वंगु वि.सं. २०४८ निसें २०५० तक ज्या यानादीगु खःसा लिपा थःगु हे सम्पादन व प्रकाशनय् ‘देसय् मरु झ्याः’ पिथना दीगु खः । वय्कः राष्ट्रिय समाचार समितिया सञ्चालक समितिया पुलांम्ह दुजः नं जुयादी ।
