सरकारं मदन भण्डारी विज्ञान व प्रविधि विश्व विद्यालय संरक्षक समितिया नायःकथं व्यवसायी पद्म ज्योतियात ल्यःगु दु ।
संरक्षक समिति नीस्वनेगु निंतिं ल्वःम्ह उम्मेदवार सिफारिस यायेत सरकारं काठमाण्डौं विश्व विद्यालयया पुलांम्ह उपकुलपति प्राध्यापक डा. सुरेशराज शर्माया संयोजकत्वय् स्वम्ह दुजः दुगु समिति (सर्च कमिटी) नीस्वंगु खः । संरक्षक समितिया वंगु मंगलबार च्वंगु न्हापांगु मुंज्यां विश्व विद्यालयया शैक्षिक, प्राज्ञिक, व्यवस्थापकीय लिसें नीति व मापदण्ड क्वःछीगु, विश्व विद्यालयया निंतिं माःगु स्रोत साधनया व्यवस्थापन यायेगु, विश्व विद्यालययात विश्वस्तरीय विश्व विद्यालयया कथं विकास यायेगु अल्पकालीन व दीर्घकालीन योजना दयेकेगु खँ क्वःछ्यूगु दु ।
समितिं मंगलबारखुन्हु पिथंगु विज्ञप्तिइ, संरक्षक समितिइ भानुप्रसाद आचार्य, लोचन ज्ञवाली, प्रा. नम प्यो सुन, डा. सन्दुक रुइत, पुष्कर वज्राचार्य, प्रा. सिराम रामाकृष्ण लिसेंया १५ म्ह दुजः दुगु खँ न्ह्यथना तःगु दु ।
विश्व विद्यालय ऐनकथं तप्यंक निर्वाचन जूपिं प्रतिनिधि सभाया दुजः, अर्थ व शिक्षा मन्त्रालयया सचिव अले विश्व विद्यालय अनुदान आयोगया प्रतिनिधि दुजः जुइगु ब्यवस्था दु ।
ल्यंगु दुजलय् विज्ञान व प्रविधिया ख्यलय् नांजाःम्ह बहालवाला बाय् पुलांपिं प्राध्यापक मध्यय् छम्ह मिसा लिसें निम्ह, विज्ञान व प्रविधि त्वःताः मेगु ख्यलय् नांजाःपिं बहालवाला बाय् पुलांपिं प्राध्यापक मध्यय् छम्ह दुजःकथं च्वनी ।
अथे हे विश्वस्तरीय विश्व विद्यालयस संरक्षकया कथं अनुभव दुम्ह मनूत मध्यय् छम्ह मिसा लिसें निम्ह, विज्ञान व प्रविधि ख्यलय् म्ह्वतिं निं १५ दँया अनुभव दुम्ह छम्ह, विज्ञान प्रविधि लागालिसे स्वाःगु उद्योग ब्यवसायस उपलब्धि मुंकूम्ह व विश्व विद्यालययात ग्वाहालि याःपिं निम्ह, विश्व विद्यालयया नायः, समाजय् च्वन्ह्याःगु योगदान याःपिं व थःपिनि पेशा व्यवसायस उपलब्धि मुंकूपिं निम्ह अले विश्व विद्यालयया अल्मुनाइ मध्यय् म्ह्वतिं नं छम्ह मिसा लिसें निम्हेसित संरक्षक समितिया दुजः दयेकेगु ब्यवस्था दु ।
