नेपाः पासा पुचः अमेरिकाय्या ग्वसालय् मेरिल्याण्डय् दँय्दसं थें थुगुसी नं सापारु हनीगु जूगु दु । सिल्भर स्प्रिंग शहरया ह्विटन पार्कय् वइगु गुंलागाः दुतिया, सनिबार (सेप्टेम्बर २)खुन्हु थी थी ज्याझ्वः यानाः सापारु हनेत्यंगु खः ।
नेपाः पासा पुचः अमेरिकाय्या छगू मू उद्देश्य अमेरिकाय् नेवाः संस्कृति प्रवर्द्धन यायेगु खः । दच्छिदुने मदुपिं थःथितिपिनि लुमन्ती नेपालय् येँय् थें अमेरिकाय् नं मस्तय्त समाः यानाः सायाः चाःहीकेगु याना वयाच्वंगु खः । थुगुसीया ज्याझ्वलय् सायाः, घिन्तांघिसि, परम्परागत नेवाः बाजं, सांस्कृतिक ब्वज्या, थी थी न्ह्यैपुगु कासात नापं नेवाः नसा दुथ्याइगु धकाः ग्वसाः खलकं धाःगु दु ।
दँय्दँसं न्ह्याका वयाच्वंगु थ्व ज्याझ्वलय् वासिंगतन डिसि मेट्रो एरियाया नेवाः, गैर नेवाः लगायत विदेशीतय्सं नं ब्वति कया वयाच्वंगु दु । ज्याझ्वलय् सायाःया निंतिं माःगु जामा, जनी, समाःज्वलं नापं ब्वति काइपिं सकसित नसाया ब्यवस्थापन ग्वसाखलकं याइसा थ्व सकतां पूवंक निःशुल्क जुइ ।
ज्याझ्वलय् ब्वति कायेत ग्वसाखलकं सकसित इनाप याःगु दु ।
