येँ– वर्ल्ड नेवाः अर्गनाइजेशनपाखें (डब्ल्यूएनओ)या निक्वःगु संस्करणया हलिं नेपालभाषा न्ह्यसःलिसः कासाया उलेज्या यानाः ब्वति काःपिं ब्वनामिपिन्त अभिमुखिकरण यायेगु ज्या जूगु दु । डब्ल्यूएनओया केन्द्रीय नायः संयुक्त श्रेष्ठया नायःसुइ सनिबारखुन्हु येँया दल्लु, चागलय् च्वंगु जगतसुन्दर ब्वनेकुथी जूगु ज्याझ्वलय् पुलांम्ह समाजसेवि व साहित्यकार हितकर वीर सिंह कंसाकारं न्ह्यसःलिसः कासाया उलेज्या यानादीगु खः ।
न्ह्यसःलिसः कासाया उलेज्याझ्वलय् पुलांम्ह समाजसेवि व साहित्यकार कंसाकारलिसें डब्ल्यूएनओया केन्द्रीय नायः संयुक्त श्रेष्ठ, केन्द्रीय वरिष्ठ न्वकू समीर महर्जन, न्वकू शाक्य सुरेन, सल्लाहकार सुरेश प्रधान, डब्ल्यूएनओ नेपाः च्याप्टरया नायः सुरेन्द्र भक्त श्रेष्ठ, साहित्यिक एम्बेसदरपिं राजभाइ जकमि व प्रतिसरा साय्मि, पासापुचः गुथि न्यूयोर्कया नायः विजय मान सिंहपिन्सं ब्वति काःपिं पुचःयात भिन्तुना बिसें धें धें बल्ला कासाय् त्याःबूयात जक बः मबिसे ज्ञान मुंकेगु खँयात हे मू आज्जु दयेकेत इनाप यानादीगु खः ।
न्ह्यसःलिसः कासाया कजि समन्तश्री बज्राचार्यं ब्वनामिपिन्त कासाया जानकारि बियादिसे अभिमुखिकरण यानादीगु खः । अथे हे न्ह्यसः निर्माण पुचःया कजि केशर मान ताम्राकारं धें धें बल्लाः कासाया नियमया खँय् जानकारि बियादीगु खः । धें धें बल्लाः कासाय् ब्वति कायेगुया निंतिं ६ गू निसें १२ गू तगिं तकया नेपाःया लिसें थी थी देय्या २३ गू ब्वनामि पुचलं नां दुथ्याकूगु खँ ज्याझ्वलय् जानकारि ब्यूगु खः ।
न्ह्यसःलिसः कासा वइगु नेपाल संवत ११४३ गुंलाथ्वः दसमि सनिबार (अगस्ट २६ / भदौ ९ गते) निसें न्ह्याइगु धकाः डब्ल्यूएनओपाखें जानकारि ब्यूगु दु ।
न्ह्यसःलिसःया बिजं कासाय् न्हाप लाःगु पुचःयात १,००० अमेरिकि डलर, ल्यू लाःगु पुचःयात ८०० अमेरिकि डलर, लियांल्यू लाःगु पुचःयात ६०० अमेरिक डलर अथे हे हःपाः लाःगु पुचःयात ४०० अमेरिक डलरया सिरपाः व प्रत्येक चरणय् त्याकीगु पुचःयात ८० अमेरिकि डलर दां सिरपाः बीगु धकाः डब्ल्यूएनओं धाःगु दु ।
न्ह्यसःलिसः कासाया नियमया निंतिं थन क्लिक यानाः स्वयादी फै ।
