येँ– मोहनीबलय् येँय् जुइगु तःजिगु पचलि आजुया जात्राय् ४५ दँ लिपा थुगुसी हानं यःसिं थनीगु जूगु दु । पचलि त्यप आजुया जात्रा छन्हु न्ह्यः पचलि आजुया न्ह्यःने ख्यलय् चौथिखुन्हु येँया क्वःने मजिपाः व लाखेननि लागाया रञ्जितकार समुदायं सुइनिकु हाकःगु यःसिं थनेगु परम्परा पीन्यादँ न्ह्यःनिसें दिनाच्वंगु खः।
थुगुसी हानं यःसिं थनाः जात्रा न्ह्याकेत सक्वं च्वय् लम्बो डाँडां सल्ला जातया सिमा विधिवत् पुज्यानाः पालाः सालाहयाः तेकुया मचली तयातःगु दु । यःसिं मचलिं पचलितक ने.सं. ११४३ कौलाथ्वः तृतिया, मंगलबार (असोज ३० गते) सनिलया ५ ताःइलय् सालाः चौथि, बुधबार (कार्तिक १ गते) सुथय् ९ ताः ईदुने थनेगु धकाः जात्रा व्यवस्थापन समितिं धाःगु दु।
यःसिँनय् ब्वयेमाःगु सुइनिकु हाकःगु हलपताः रञ्जितकारतय् गुथिइ दुसा उकियात यःसिं गुथिया नायलं पुज्यानाः ब्वयेकेगु परम्परा दु । थुगुसी यःसिं हानं थनेत सरकारं स्वीकृति बियाः सिमा पालाहःगु खः।
रञ्जितकार गुथिया ९१ दँया नायः बालगोपाल रञ्जितकारं थुगुसी हानं यःसिं थनेत पुज्यानाः हलपताः छानादीगु ज्याझ्वः दु। उकिया निंतिं पचलि भैरब जात्रा व्यवस्थापन समितिं ल्हानाच्वंगु यःसिंगाः म्हुयाः माःगु तयारी यानाच्वंगु दु।
४५ दँ लिपा यःसिं थनाः जात्रा यायेदयाः पचलि आजुलिसे सम्बन्धित सकल खलःपुचःत उत्साहित जूगु समितिया सांस्कृतिक संयोजक पुष्परत्न प्रजापतिं धयादिल।
