विश्व नेवाः संगठन हलिं नेवाः दबूयाया ग्वसालय् शहीद शुक्रराज शास्त्री जोशीया नेपालभाषाय् योगदान विषयस विशेष ज्याझ्वः जूगु दु । ज्याझ्वः ने.सं. ११४४ प्वहेलाथ्वः चतुर्दशि, बुधबारखुन्हु (माघ १० गते) जूम प्रविधिपाखें जूगु खः ।
हलिं नेवाः दबूया केन्द्रीय नायः भाजु संयुक्त श्रेष्ठंं शुक्रराज जोशीया किपाय् मत च्याकाः लसकुस न्वचु बियाः न्ह्याकादीगु ज्याझ्वलय् हलिं नेवाः दबूया सल्लाहकार प्रा प्रेमशान्ति तुलाधरंं शुकराज जोशिं नेपालभाषा ख्यलय् यानादीगु योगदान विषयस दुग्यंक थःगु खँ न्ह्यब्वया दिल । वय्कलं शुक्रराज शास्त्रिं तसकं दुग्यंगुु नेपालभाषा ब्याकरण च्वयाः ज्वःमदुगु योगदान यानादीम्ह नेपालभाषाया न्हापांम्ह व्याकरणविद् धयादिसें शास्त्रिं नेपालभाषा मचा साहित्यय् नं तःधंगु योगदान यानादीगु खँ नं न्ह्यब्वया दिल ।
अथे हे मेम्ह पाहां युवा नेवाः न्ह्यलुवाः सांसद शैलेन्द्र वज्राचार्यंं शहीद शुक्रराज जोशीया लिसेलिसें उगु ईया ४ म्ह महान शहीदपिन्सं तसकं निस्वार्थ भावनां देय्या निंतिं जीवन वलिदान बियावंगु खँ न्ह्यथना दिसें अजःपिं देशभक्त शहीदत थौंया युवा पुस्तां बांलाक म्हमस्यूनि धयादिल । वय्कःपिनिगु हःपाः कयाः थौंया युवा पुस्ता न्ह्याः वनेमाःगु खँय् बः बियादिल ।
अथे हे मेम्ह पाहां आनन्दराज जोशिं शहीद परिवारपाखें नुगःखँ तयेगु झ्वलय् शहीद शुक्रराज शास्त्री गुगुं नं पार्टी आवद्ध मजुसे मुक्कं राष्ट्रया निंतिं स्वतन्त्ररुपं राजनीति यानादीगु खँ धयादिल । अथे हे वय्कलं शुक्रराज शास्त्रीया केहें चन्द्रकान्ता मल्लंं थः दाजु शुक्रराजया हःपाः कयाः थःम्हं हे नेपालय् न्हापां मिसा ब्वनेकुथि चायेकाः मिसा शिक्षा विकासय् तःजिगु योगदान यानादीगु खँ धयादिल ।
लोककविलिसें हलिं नेवाः दबूया साहित्यिक एम्बेसडर राजभाइ जकःमिंं शहीद शुक्रराजया वारे चिनाखँ न्यंकुसे शुक्रराज शास्त्री जोशी नेपालभाषाया छम्ह महारथी नं खः धयादिल ।
नांजाःम्ह पत्रकार सिल्भिया राजोपाध्यायंं न्ह्याकादीगु थुगु ज्याझ्वलय् दबूया केन्द्रीय दुजः डा. नरेश शाक्यंं सुभाय् न्वचु बियादीगु खः । सुभाय् न्वचुया झ्वलय् वय्कलं हलिं नेवाः दबूपाखें सहीद धर्मभक्त माथेमाया बारे नं ज्याझ्वः न्ह्याके धुनागु खँ न्ह्यथना दिल ।
फेस बूकय् नं लाइभ जूगु थुगु ज्याझ्वलय् थी थी देय्या तःम्हमछि नेवाः व्यक्तित्वपिन्सं ब्वति कयादीगु खः ।
