विश्व नेवाः सरंगठन ‘हलिं नेवाः दबू’ दबूया ग्वसालय् मदुम्ह जनगायक भृगुराम श्रेष्ठया लुमन्तिइ ज्याझ्वः याःगु दु। दबूलिं वय्कया लत्या तिथिइ ने.सं. ११४४सिल्लागा तृतिया खुन्हु (फागुण १५ गते) खुन्हू जूम प्रविधिपाखें लुमन्ति मुँज्या याःगु खः । दबूया केन्द्रीय नायः संयुक्त श्रेष्ठंं जनगायक भृगुराम श्रेष्ठया किपाया न्ह्यःने त्वाःदेवाय् मत च्याकाः उलेज्याया नापं लसकुस न्वचु बियादीगु खः । लसकुसया झ्वलय् वय्कलं झी भृगुराम श्रेष्ठ जनताया सः जुयाः म्वानावंम्ह जनगायक खः धयादिल । वय्कया ‘माया रे रत्न’ म्ये हायेका शुभारम्भ जूगु ज्याझ्वलय् जनकवि दुर्गालाल श्रेष्ठया ंस्याचुगु कवितात्मक नुगः खँया भिडियो क्यगु खः । भिडिओय् जनकवि श्रेष्ठं ‘संसारं मन्त धाःसां भुगुराम छ अन तक दयाच्वनी गन तक छंम्ह दुर्गालाल ल्यनाच्वनी’ धयादिल । वरिष्ठ संगीतकार व गायक अमरराज राजोपाध्यायंं जनगायक भृगुरामया सः तसकं शक्तिसाली धयादिसे वय्कः मदयाः झीगु नेवाः संगीत ख्यलय् तसकं ह्याकिं वंगु खँ तसें भृगुरामया लुमन्ति थःम्हं च्वयादीगु छकूचा म्ये नं न्यंकादीगु खः ।
थुकथं हे साहित्यकार हरिओमपति राज राजोपाध्याय (आरके निर्मल) नंं जनगायक भृगुराम नेवाः संगीत व नाटक ख्यःया छम्ह ज्वःमदुम्ह व्यक्तित्व खः धयादिसें वय्कःया जीवनय् ततःधंगु दुःख वःगु खँ कनादिल। वय्कया तःधिकःम्ह काय् प्रकाश जोशी, म्ह्याय् नांजाःम्ह कलाकार नविना जोशी व जहान आकाझाकांं मत्यवं मदुगु व थज्वःगु स्वंगू तःधंगु दुःख वलं नं वय्क तसकं धैर्य तयाः झी न्ह्यःने ख्वबि महायेकुसे म्वाना वन धयादिल ।
दबूया संस्थापक नायः बालगोपाल श्रेष्ठंं भृगुरामथें जाःम्ह गायक मन्तं नं सरकार स्तरं छु. हे मयाःगु खँय् तसकं आपत्ति प्वंकादिल ।
अथेहे दबूयाया निवर्तमान नायः सिजन श्रेष्ठं भृगुरामजुया म्ये न्हापांनिसें न्यना वयाच्वनागु तर वय्कःयात प्रत्यक्षरुपं सन् २०१८ स येँय् जूगु हलिं नेवाः दबूया कन्फरेन्सय् व हलिं नेवाः न्हिया ज्याझ्वलय् दकलय् न्हापां नापलाःगु खँ कनादिल ।
छेँजःपाखे जबिनराम श्रेष्ठं ं‘बाःनं थःपिन्त मांभाय्या सेवा यायेमाःगु खँ बरोबर कनावंगु खँ न्ह्यथसे वय्कः तसकं हे आत्मबल बःलाम्ह मनू खः, तर अन्तय् क्यान्सर ल्वचं हे कःगु कारणं कुतः याना नं म्वाके मफुत’ धयादिल ।
कलाकार कविना सिंह व निर्देशक सुनिता राजभण्डारी‘जुनु’ पिनिसं भुगराम श्रेष्ठया कलापक्षयात कयाः न्व वानादीगु खः
ज्याझ्वलय् लोककवि राजभाइ जकःमिंं जनगायक भृगराम श्रेष्ठया व्यक्तित्वयात कयाः चिनाखँ न्यंकादीगु खः ।
ज्याझ्वःया कजि व गाय्क पवित्र कसाःनं जनगायकयात सदांसदां म्वाकेया लागी वय्कलं हालावंगु म्ये झीसं फक्व प्रचार यायेमाः धयादिसे ‘गां हे न्ह्यलं मचाय्कं नेपाल गय् दनीगु ?’ म्ये हालाः न्यंकादिल ।
दबूया युथ एम्वसडर नितु डंगोलंं न्ह्याकादीगु ज्याझ्वलय् दबूया केन्द्रीय दुजः डा. नरेश शाक्यंं सुभाय्् न्वचु बियादीगु खः । सुभाय् न्वचुया झ्वलय् वय्कलं हलिं नेवाः दबू पाखें मदये धुंकूपिं नेवाः महारथिपिनिगु योगदानयात कयाः थीथी इलय् ज्याझ्वः न्ह्याका वयाच्वनागु धासें आः वइगु शनिवार खुन्हु सदावहार गायक योगेश वैद्यया लुमन्ति मुँज्या याये त्यनागु खँ नं कनादिल । निघौति तक जूगु ज्याझ्वलय् जनगाय्क भृगुरामया न्यापु म्ये हायेकेगु ज्या नं जूगु खः ।
