यल -वर्ल्ड नेवाः अर्गनाइजेशनं त्रिभुवन विश्वविद्यालय अन्तर्गत पाटन संयुक्त क्याम्पसय् स्नातक तहय् नेपालभाषा ब्वनाच्वपिं जेहेन्दार ब्वनामिपिन्त छात्रवृत्ति लःल्हाःगु दु । नेपालभाषा शिक्षण समितिया प्रमुख निर्मला श्रेष्ठया नायःसुइ बुधबार यलया यलध्वाखाय् जूगु छगू ज्याझ्वलय् जेहेन्दार ब्वनामिपिन्त छात्रवृत्ति लःल्हाःगु खः ।
ज्याझ्वलय् वर्ल्ड नेवाः अर्गनाइजेशनया न्वकू शाक्य सुरेनं खुम्ह ब्वनामितय्त दच्छिया छात्रवृतिकथं छम्हसित १५,००० तकाया ल्याखं व छम्ह ब्वनामियात आर्थिक ग्वाहालि कथं १५,००० तका लःल्हाना दीगु खः ।
ज्याझ्वलय् क्याम्पस प्रमुख डा. लक्ष्मण सिहं कुँवर, नेपालभाषा केन्द्रीय विभागया प्रमुख डा. राजनलाल जोशी, नेपाल प्रज्ञा प्रतिष्ठानया प्राज्ञ अगिव बनेपाली, वर्ल्ड नेवाः अर्गनाइजेशनया छयाञ्जे लुमु श्रेष्ठ, मिडिया एम्बेसडर विगेन तुलाधर लिसें मेमेपिन्सं ब्वति कयादीगु खः।
ज्याझ्वलय् स्नातक तहय् नेपालभाषा ब्वनाच्वंपिं ब्वनामितय्सं वर्ल्ड नेवाः अर्गनाइजेशनं न्हिया न्हिथं यानावयाच्वंगु गुगल ट्रान्स्लेटया ज्याय् ग्वाहालि यायेगु प्रतिवद्धता नं प्वंकूगु खः। पाटन संयुक्त क्याम्पसय् नेपालभाषा कयाः ११ म्ह ब्वनामितय्सं स्नातक तहया न्हापांगु दँय् अध्ययन यानाच्वंगु दु।
