येँ, थनया रत्न राज्यलक्ष्मी क्याम्पसया नेपाली, नेपालभाषा विभाग व सुकुन्दा साहित्य पाःलाःया मंकाः ग्वसालय् भाषानिभाः प्रेमबहादुर कसाःया १०७ क्वःगु बुन्हि क्याम्पसया सभाहलय् हंगु दु ।
सुकुन्दा साहित्य पाःलाःया नायः प्रशान्त डंगोलं लसकुस यासे सुरु जूगु थुगु ज्याझ्वःया मुंज्यानायः डा. विष्णु प्रसाद ज्ञवाली जुयादीगु खः । ज्याझ्वलय् दिब्या ताम्राकारं प्रेमबहादुर कसाःया योगदान व आसा सफूकुथिया योगदानयात कयाः दुग्यंक कनादिल । अथे हे मदनसेन बज्राचार्यं नं देय् व जनतायात च्वन्ह्याकेगु निंतिं सदां सदां समाजसेवी जुयाः ज्या यानादीम्ह महान विद्वान प्रेम बहादुर कसाः खः धकाः धयादिल ।
प्रा. डा. चन्द्रमान बज्राचार्यं प्रेमबहादुर अद्भूत क्षमतावान प्रतिभावान ब्यक्तित्व खः धकाः धयादिसे थजाःगु ज्याझ्वः फुसां मफुसां न्ह्याका वयाच्वंपिं नेपालभाषा अभियन्तातय्त सुभाय् बिसें मेमेपिं विद्वानतय्गु बुन्हि हनेगु ज्याझ्वः नं मदिक्क न्ह्याका वने फयेमा धकाः धयादिल ।
लिपतय् मुंज्यानायः डा. विष्णुप्रसाद ज्ञवालिं भाषा संरक्षणया निंतिं सनाजूपिं छगू पुस्ता मदया वनेधुंकूगु व आः न्हूपिं पुस्तातय्सं यानाच्वंगु कुतः च्वछाये बहः जूगु खँ कनादिल । ज्याझ्वः नांजाःम्ह मेहालामि व भाय्ह्यःमि पवित्र कसालं न्ह्याकादीगु खः ।
