यल -हलिं नेवाः दबूया ग्वसालय् नेपालय् दकलय् न्हापां बाखं च्वयाः इतिहास ज्यानादीम्ह साहित्यकार व मिसा न्ह्यलुवाः मय्जु मोति लक्ष्मी उपासिकाया ११५ क्वःगु जन्म न्हिया ज्याझ्वः जूगु दु। दबू नं वंगु श्रावण ६ खुन्हुं जूमपाखें मोति लक्ष्मीया योगदानयात लुमकुसें जन्मन्हिया ज्याझ्वः यागु खः ।
दबूया केन्द्रीय नायः संयुक्त श्रेष्ठंं मोतिलक्ष्मीया किपाया न्ह्यःने न्हू प्रविधि छ्यलाः त्वाःदेवाय् मत च्याकाः उलेज्या यानादीगु खः। ज्याझ्वलय् लोककवि राजभाइ जकःमिं स्वीखुदँ न्ह्यः मोतिलक्ष्मीया च्यदँ बुन्हि प्रतिभा साहित्यिक परिवारपाखें जनस्तरं हंगु खँ न्ह्यथसे मोतिलक्ष्मीया कृतित्व व व्यक्तित्व दुथ्याःगु चिनाखँ ब्वनादीगु खः।
ज्याझ्वलय् पाटन क्याम्पसा नेपालभाषा विभागया प्रमुख उप प्रा. निर्मला श्रेष्ठंं मोतिलक्ष्मी उपासिकां जीवन ज्वःछिं नेवाः भाषा, साहित्य च्वन्ह्याकेत तन, मन, धन बियाः तःजिक योगदान याना झाःम्ह छम्ह नेपाः देय्या साहसी मिसा खः धयादिल ।
थुकथं हे भाषा आयोगया दुजः सुरेश किरण मानन्धरंं मोतिलक्ष्मी उपासिका उगु इलय् हे नेपालभाषा साहित्य ख्यलं न्ह्याः झाःम्ह मिसा आन्दोलनया छम्ह ज्वःमदुम्ह आइकन खः धयादिल ।
ज्याझ्वलय् नेपालभाषा मिसा खलःया पुलांम्ह नायः मंगला कारंजितंं मोतिलक्ष्मी उपासिका छम्ह साहित्यकार, बौद्ध धर्म सेवी जक मखुसें नेपाः देय्या छम्ह शसक्तम्ह मिसा नेतृ नं खः धयादिल ।
विश्वया थीथी देय्या नेवाः व्यक्तित्वपिंसं ब्वति काःगु ज्याझ्वलय् मोतिलक्ष्मी उपासिकाया थीथी पक्ष दुथ्याःगु किपा ब्वयेगु ज्या नं जूगु खः । दबूया न्वकू समन्त बज्राचार्यं न्ह्याकादीगु ज्याझ्वलय् दबूया मूदुजःलिसें डब्लुडिबि ज्याझ्वःया कजि डा. नरेश शाक्यंं सुभाय् न्वचु बियादीगु खः ।
