अमेरिकाया ल्याम्ह अमेरिका गुठीं योमरी पुन्हीया झ्वलय् सांस्कृतिक शिक्षा, परम्परा व उत्सवयात छथाय् हयाः थीथी ज्याझ्वः याःगु दु।
गुठीं भर्जिनियाया चान्टिलीइ याःगु ज्याझ्वलय् मस्तेगु गतिविधि,नेपाल भासा अनलाइन कक्षाय ब्वमिपिन्त सम्मान, यःमरि दयेकेगु कार्यशाला, सांस्कृतिक ज्याझ्वः लगायतया ज्याझ्वः जूगु खः।
ज्याझ्वलय् मस्तेगु गतिविधि अन्तर्गत मस्तेसं यःमरि विषयनापं मेमेगु सांस्कृतिक च्वःकिपातय् रंग तःगु खःसा यःमरि दयेकेगु सत्रय् मस्तेसं यःमरी दयेकेगु परम्परागत कला स्यनाकाःगु खः। अथेहे ज्याझ्वलय् ग्रीष्मकालीन नेपाल भासा अनलाइन कक्षाय् ब्वति कापिं ब्वमितयत सम्मान याःगु खः। ब्वमिपिन्त मिसेस टुरिजम युएसए युनिभर्स २०२४ या विजेता राजश्री श्रेष्ठं दसिपाै लःल्हानादीगु खः।
ज्याझ्वलय् गुठीया नायः पुष्कर प्रजापतिइ मिसेस टुरिजम युएसए युनिभर्स २०२४ या विजेता श्रेष्ठयात थुगु उपाधि त्याकेत ताःलागुलिइ हनादीगु खः। अथेहे ज्याझ्वलय् ५० मल्याक मस्तेगु सहभागिताय् यःमरि दयेकेगु कलालिसें यःमरिया सांस्कृतिक महत्त्वया ज्ञान बिइगु कार्यशाला नं जूगु खः ।
ज्याझ्वलय् ल्याम्ह अमेरिका गुठीया ब्वमितयसं नेवाः म्ये, प्याखंलिसें परम्परागत यःमरि पुन्हिया थिमय् सांगितिक प्रस्तुती ब्यूगु खः। अथेहे परम्परागत धिमय् बाजं नं न्ह्यब्वगु खः। ज्याझ्वलय् नेपाःया अनप्लग्ड ब्यान्डपाखें सांगीतिक ज्याझ्वः नं जूगु खः। ज्याझ्वलय् डिमएमभी लागाया सत्या मल्याकसिगु सहभागीता दुगु खः।
