न्हूदँ वल, वन दय्ँदँसं
करं बःरं वइवनी न्ह्याबले नं
यःसां मयःसां दुनुगलं भिन्तुना दु । सकसितं ।
लसतां जिगु भिंमनंतुना फुक्कसितं ।।
भिन्तुना कालबिलया ज्याझ्वः तुच्चाया ब्यवस्थापन
पार्टी पतिकंया कतिलाःगु थःगु हे मूवंगु भाषण ।।
नल, त्वन हाइ हेल्लो माकुक्क भजलपा
क्वचाल ज्याझ्वः सकसितं वने न्हिं ज्वजलपा ।।
दय्ँदसंया झीगु जनमन धात्थ्यं गुखेरिखे ?
मतलब, झीगु आज्जु न्ह्याबलें छखेरिखे ११
राज्यं छ्यलेमाःगु नेपाल सम्बत् देय्न्यंक,ं थौंतक नं धुलमुल
मछ्यः छुयाये न्ह्याबलें बिइमाः ज्ञापनपत्र, थौंतक नं अलमल ।।
बसन्तपू दबुलिइ दय्ँदसं न्यंकं सः थ्वइ
जवया न्हाय्पनं न्यनाः देपां अथें पितछ्वइ ।।
राज्यसत्ताया ज्या मूपाहाँ जुयाः चाकुसवाःया भाषण यायेगु
ग्वसाःखलःया ज्या मूपाहाँ झाल, लसकुस याना हनेगु ।।
आशाकुति सवाः छुं ह्यूपाः वइ ला धइगु विश्वास
मदु न्ह्याबलें गथे खः अथे हे सदां थें निरास ।।
न्हूदँ क्वचाल सभा समारोह तनावनी
दच्छि यंकंया इन्क्लापया ज्याझ्वः सुनां ल्ह्वनी ? ।।
दय्ँदसं न्ह्याबलें न्हूदँ वइ वनी
व हे मुलु व हे सुका, झीगु वां व कुया स्वांमाः सुनां हनी ? ।।
अथे नं सकसितं ने.सं. ११४५ न्हूदँया भिन्तुना
छन्हूया दिनय् झीगु आज्जु पूवनेमा धइगु मनंतुना ।।
