अग्गमहागन्थवाचक पण्डित सासनधज धम्माचरिय भिक्षुणी धम्मावती गुरुमां थ्वहे वइगु गुरुपुन्हीकुन्हु गुइदँय् क्यनीगु जूगु दु । वसपोलया गुइदँ बुन्हीया लसताय् धर्मकीर्ति महाविहारं तःजिक वसपोलया सुस्वास्थ्य व ताःआयुया कामना यासें तःजिक ज्याझ्वः यायेत्यंगु दु ।
धर्मकीर्ति महाविहारं वइगु शनिवाः गुरुमांया बुदिं तःजिक हनेगु नितिं समारोह समिति नीस्वनेगु ज्याझ्वः तःगु दु ।धम्मावती गुरुमांयात थीथी संघसंस्थां तःताकथं हनेधुंकूगु दुसा बुद्धधर्मय् तःधंगु उपाधि कथं वसपोलयात सासनधज धम्माचरिय उपाधि वि.सं. २०१९ सालय् लःल्हाःगु खः ।
सासनधज धम्मचरियया अर्थ बुद्धसासनया ध्वाँय् ब्वयेकेफुम्ह व्यक्तिकथंया उपाधि खः । अथेहे, वसपोलयात २०४८ सालय् म्यानमारया सरकारं अतिकं हनेबहःगु बुद्धधर्मया उपाधि अग्गमहागन्थवाचक पण्डित लःल्हाःगु खः । वसपोलं आःतकया दुने सच्छिगुं मल्याक सफू च्वया बिज्यायेधुंकूगु दुसा न्ययगू मल्याक विहार निर्माणया ज्या यानाः बिज्यायेधुंकूगु दु ।
