बाखं दबूया ग्वसालय् स्वनिगःया पर्यटकीय लागाया रुपय् कयातःगु नगरकोटय् बाखं मुँज्या वंगु चैत २४ गते शुक्रवाः व चैत २५ गते शनिवाः निन्हुयंक जूगु दु । बाखं दबूया संस्थापक दुजः लोचनतारा तुलाधरं लसकुस यानादीगु उगु ज्याझ्वलय् वयक, अञ्जना ताम्राकारलिसें नीनिम्हेसिनं बाखं ब्वनाः न्यंकादीगु खः ।
मुँज्याय् ब्वंगु बाखंयात कयाः नांजाःम्ह समालोचक पूर्ण ताम्राकारं थीथी बाखं च्वमिपिन्सं ब्वना न्यंकादीगु बाखंयात कयाः समीक्षा व केदार सितुं टिप्पणी यानादीगु खः । मुँज्याया झ्वलय् बाखं च्वमिपिनि दथुइ बाखं साहित्ययात कयाः सहलह नं जूगु खः । लिसें बाखं ख्यःयात अझ च्वन्ह्याका यंकेगु निंतिं नियमित रुपं सहलह यानाच्वनेमाःगु खँय् नं मुँज्याय् ब्वति कयादीपिंसं विचाः तयादीगु खः ।
