न्यूज नेपाः डट कमया खँय् जानकारि बीगु ता तयाः विश्वब्यापिकथं छगू ज्याझ्वःया ग्वसाः ग्वःगु दु । म्हिगः नेपाल संवत ११४३ तछलागाः अस्तमि, आइतबारखुन्हु नेपाःया ईकथं बहनी ९ ताः इलय् जूमपाखें ज्याझ्वः जूगु खः ।
न्यूज नेपाः डट कमया प्रवन्ध निर्देशक सिजन श्रेष्ठया नायःसुइ न्ह्याःगु उगु जूम ज्याझ्वलय् प्रकाशक विगेन तुलाधर, मू सम्पादक शर्मिला श्रेष्ठ राजोपाध्याय (सिल्भिया), वरिष्ठ संवाददाता जयम्बु रन्जित, नेपालभाषाया भाषा सम्पादक पाैभाः साय्मि, खस नेपालि साहित्यया सम्पादक सुशील ताम्राकार, नेपालभाषा साहित्यया सम्पादक केशरमान ताम्राकारपिन्सं थःथःपिनि नुगःखँ तयादिसें न्यूज नेपाः डट कम व थ्वया भावि योजनाया खँय् जानकारि बियादीगु खः ।
ज्याझ्वलय् अशोक पालिखे, दीपक डंगोल, मीरा ज्योति, हिसिलिना शाक्य, नरेश ताम्राकार, शुभम श्रेष्ठ, उदय श्रेष्ठ, वीरेन्द्र नकःमि, शाक्य सुरेन, डा. लोचन मानन्धर, अन्जना ताम्राकार, कुमार नापित, वैकुण्ठ श्रेष्ठ, सुरेन्द्र भक्त श्रेष्ठ व पुष्कर प्रजापतिपिन्सं न्यूज नेपाः कमय् मचातय्त बः बियाः च्वसु तयेमाःगु, नेवाः आखःया छ्यलाबुला नं यायेमाःगु, कला संस्कृतियात बः बीमाःगु, जिल्ला जिल्लाया बुखँ ज्याखँयात थाय् बीमाःगु, बुखँ जक मजुसे न्हूगु बिचाः / सोचयात थाय् बीमाःगु, बुखँ निष्पक्ष जुइमाःगु लिसेंया सुझावत नं बियादीगु खः ।
ज्याझ्वलय् संवाददाता नीतु डंगोललिसें रामलाल श्रेष्ठ, स्वस्तिका श्रेष्ठ,भुवन श्रेष्ठ, निलम श्रेष्ठ, रजनी प्रधान, किरण, नरेश शाक्यपिन्सं नं ब्वति कयादीगु खः । थुगु जूम ज्याझ्वलय् नेपाःया लिसें अमेरिका, क्यानाडा, जर्मन, इजराइल, बेल्जियम, यूके, यूएइस च्वनादीपिं नेवाःतय्सं ब्वति कयाद्यूगु खः ।
