येँ– वर्ल्ड नेवाः अर्गनाइजेशनं (डब्ल्यूएनओ) निगू संस्करणया हलिं नेपालभाषा न्ह्यसःलिसः कासाया धलः पितब्यूगु दु । पितब्यूगु धलःकथं धें धें बल्लाः कासा वइगु ने.सं. ११४३ गुंलाथ्वः दसमि, सनिबार (भदौ ९ गते)निसें न्ह्याइ ।
धलःकथं वइगु गुंलाथ्वः दसमि, सनिबार (भदौ ९ गते)निसें यंलाथ्वः अस्तमि, सनिबार (असोज ६ गते)तक धें धें बल्लाःकथं न्हापांगु चरणया कासा जुइसा, न्हाप व ल्यू लानाः त्याःगु पुचः निगूगु चरणया धें धें बल्लाः कासाय् दुथ्याइ । निगूगु चरणया धें धे बल्लाः कासा वइगु यंलागाः पारु, सनिबार (असोज १३ गते) निसें कौलाथ्वः सप्तमि, सनिबार (कार्तिक ४ गते) तक जुइ ।
अथे हे निगूगु चरणया धें धें बल्लाः कासाय् न्हाप व ल्यू लानाः त्याःगु पुचः स्वंगूगु चरणय् दुथ्याइ धाःसा स्वंगूगु चरणया धें धें बल्लाः कासा वइगु कौलाथ्वः पुन्हि, सनिबार (कार्तिक ११ गते) व कौलागाः सप्तमि, सनिबार (कार्तिक १८ गते) जुइ । स्वंगूगु चरणय् न्हाप व ल्यू लाःपिं पुचः दथुइ लिपांगु धें धें बल्लाः कासा कौलागाः त्रयोदसि, सनिबार (कार्तिक २५ गते) जुइ ।
धें धें बल्लाः कासा वइगु गुंलाथ्वः दसमि, सनिबार (भदौ ९ गते) निसें कौलागाः त्रयोदसि, सनिबार (कार्तिक २५ गते)तक सनिबारपत्तिं नेपाःया ईकथं बहनी ६ ताः इलय् जुइ । लिपांगु धें धें बल्लाः कासाय् न्हाप लाःगु पुचःयात १,००० अमेरिकि डलर, ल्यू लाःगु पुचःयात ८०० अमेरिकि डलर, लियांल्यू लाःगु पुचःयात ६०० अमेरिकि डलर व हःपाः लाःगु पुचःयात ४०० अमेरिकि डलर अले प्रत्येक चरणय् त्याःगु पुचःयात ८० अमेरिकि डलर दां सिरपाः बीगु धकाः डब्ल्यूएनओं धाःगु दु ।
थुगु संस्करणय् ६ निसें १२ गू तगिं तकया नेपाःलिसें थी थी देय्या ब्वनामिपिनि पुचः दथुइ धें धें बल्लाः जुइगु व थुगुसी पुचःया नां नेवाःमरिया नामं छुनागु धकाः डब्ल्यूएनओं धाःगु दु । निदँ न्ह्यः जूगु न्हापांगु संस्करणय् पुचःया नां स्वांया नामं छुनातःगु खः ।
न्ह्यसःलिसः कासाया नियमया निंतिं थन क्लिक यानाः स्वयादी फै ।
