यें -शिक्षाविद्लिसें इतिहासविद् ज्ञानकाजी खिं मानन्धर मन्त । शिक्षा, संस्कृति व सामाजिक ख्यलय् ज्वः मदुगु योगदान यानादीम्ह मानन्धर ८९ दँया बैसय् थाैं चान्हय् मदुगु खः । छुं ई न्ह्यवंनिसें मफया च्वंम्ह वय्कः वासः याका च्वनादीगु खः ।
नेपाल संवत १०५५ थिंला (वि.सं. १९९१ पुष)य् अबु मोहन लाल खिं मानन्धर व मां लक्ष्मीमाया मानन्धरया चीधिम्ह काय्कथं भ्वँतया वांख्यः त्वालय् बूम्ह वय्कःया दी लिजेण्ड अफ नेपाल, कुमारी, खड्गजोगिनी, श्वैत चैत्य, नेपाल–आख्यान र नाटक, कपिलवस्तुस भगवान्, बनेपा स्तवन, अरनिकोया श्वेत चैत्य, माइथस् एण्ड लिजेण्डस् अफ नेपाल, बनेपा सातगाउँ, मानन्धरतय्गु विषय छुं खँ व पश्चाताप लिसेंया नेपालभाषा, खय् भाय् व अंग्रेजि भाय्या थी थी सफूत पिदंगु दु ।
आजाद मा.वि., चैतन्य मा.वि.या लिसें थी थी ब्वनेकुथी ३८ दँ शिक्षण सेवा यानादीम्ह मानन्धर भ्वँतया अप्वः धया थें दुग्यंपिं मनूतय् गुरु नं जुया दी । काभ्रे जिल्लाय् अंग्रेजि विषय बि.एड. याःम्ह न्हापांम्ह वय्कः भ्वँतया इतिहासया गुरु धकाः नं नांजाः । वय्कः पुलांगु थी थी बाजं व संगीतया ज्ञाता नं जुया दी ।
