पासा पुचः गुथि यूकेया नायलय् सुशील प्रजापतियात सर्वसम्मतकथं ल्यःगु दु । सनिबार लन्डन प्लमस्टिडया गोर्खा क्याप्रिकनय् क्वचाःगु पासा पुचः गुथिया अधिवेशनय् नायः पदय् प्रजापतियात सर्वसम्मतकथं ल्यःगु खः ।
अथे हे न्वकुली रुक्मणि मानन्धर, दिव्य महर्जन व विजय मान डंगोल, मूछ्यान्जेय् नगेन्द्र श्रेष्ठ, दांभरिनय् रजनि श्रेष्ठ, ल्यू छ्यान्जेय् प्रजेश श्रेष्ठ, लिसा दलि श्रेष्ठ व ल्यू दांभरिनय् श्याम श्रेष्ठयात ल्यःगु दु । अथे हे ज्यासना पुचःया दुजलय् सबिता मानन्धर, मधुसुदन कायस्थ, सचेतन तुलाधर, यादव श्रेष्ठ, रमेश श्रेष्ठ, माधवलाल श्रेष्ठ, सोनी श्रेष्ठ, सुरोज मास्के, केशव श्रेष्ठ, चरण प्रधान व सकिला मानन्धरयात ल्यःगु दु ।
बालमुकुन्द जोशीया संयोजकत्वय् ओजेश सिंह छ्यान्जे व अमृत स्थापित, सचेतन तुलाधर, शिबजी श्रेष्ठ व मदन मान श्रेष्ठ दुजः दुगु ल्यज्या पुचलं न्हूगु ज्यासना पुचःया ल्यज्या ज्याखँ न्ह्याकूगु खः ।
थ्वयां न्ह्यः निवर्तमान नायः ओजेश सिंहया नायःसुइ क्वचाःगु अधिवेशनय् न्वकू सुशील प्रजापतिं संस्थाया प्रगति प्रतिवेदन व दांभरिं रजनि श्रेष्ठं आर्थिक प्रतिवेदन न्ह्यब्वया दीगु खः । अथे हे, अल्डरसट कचापाखें प्रजेश श्रेष्ठ, लन्डनं ओजेश सिंह, रेडिङं दिब्य महर्जन व साउथ इष्ट लन्डपाखें नगेन्द्र श्रेष्ठं कचाया प्रगति विवरण न्ह्यब्वया दीगु खः ।
गुथिया नीस्वना दुजःपिं अमृत स्थापित, महन्त श्रेष्ठ, शशी मानन्धर, बालमुकुन्द जोशी, उत्तम अमात्य, अर्जुन प्रधान व धर्म शाक्य, संस्थाय् ताःईतक योगदान यानादीपिं दुजःपिं कुमार श्रेष्ठ, मनिष श्रेष्ठ, राजेन्द्र श्रेष्ठ, जानकी कायस्थ, कपिल श्रेष्ठ, राजन मल्ल व केशव श्रेष्ठया लिसें सल्लाहकारपिं सचेतन तुलाधर, यादव श्रेष्ठ, शिवजी श्रेष्ठ, कपिल श्रेष्ठ व राजेन्द्र श्रेष्ठयात हंगु खः ।
अथे हे, मेमेगु ज्याय् योगदान यानादीपिं मध्यय् रथ दयेकेगुली सोहन सुवाल, विष्णुप्रसाद प्रजापति व सञ्जिव श्रेष्ठ, धिमे कक्षाय् सुरज मकाजु व कृष्ण वैद्य, नेपाल लिपि कक्षाय् सुनिता डंगोल, आनन्दकुमार महर्जन व सुवर्ण बज्राचार्य, नेपाल भाषा कक्षाय् मेरिलिना फ्रिसोन, आइटी ग्वाहालिइ नीर महर्जन, वेबसाइट दयेकेगुली समेन महर्जन, एक्टिभ रनय् इश्वर महर्जन, स्वयमसेवाय् महेन्द्र शाक्य, इहि व कय्तापुजाय् सुशिला मल्ल, बिना श्रेष्ठ व परशुराम बदगामी, मदिक्क ग्वाहालि यानादीगुली मदनमान श्रेष्ठयात नं हंगु खः ।
अथे हे नेपालं वःम्ह नांजाःम्ह मेहालामि सहिमा श्रेष्ठयात नं गुथिं विशेष सम्मान याःगु खः । न्हू ल्यःगु ज्यासना पुचःयात नीस्वना दुजःपिं अमृत स्थापित व बालमुकुन्द जोशी, सल्लाहकारपिं शिबजी श्रेष्ठ, मनिष श्रेष्ठ, सचेतन तुलाधर, निवर्तमान नायः ओजेश सिंह लिसेंया मनूतय्सं भिन्तुना बियादीगु खः ।
न्हूगु ज्यासना पुचःया पाखें नायः सुशील प्रजापतिं आभार प्वंका दिसे बेलायतय् नेवाः संस्कृति, भाय्, कलाया संरक्षण व प्रवर्द्धन यायेगु प्रतिवद्धता प्वंका दीगु खः ।
