विराट नेपालभाषा साहित्य सम्मेलन गुथिया पुलांम्ह नाय:, सल्लाहकार, नेपालभाषा साहित्यया चिबाखं च्वमि गोविन्दमान श्रेष्ठया लुमन्तिइ बिचाः मुंज्या जूगु दु ।
विराटया नाय: महेन्द्रगोपाल कर्माचार्यया नाय:सुइ म्हिगः शनिबाः जूगु लुमन्ति मुंज्याय् कवि योगेन्द्र प्रधान, पलिस्थाया नाय:लिसें समीक्षक पूर्णकाजी ताम्राकार, सिद्धिदास प्रतिष्ठानया नाय: नरेन्द्रभक्त हाडा, नेवा: देय् दबू, बागमती प्रदेश लागाया कजि श्रीकृष्ण महर्जन, छेँज:पाखें डा. जयनमान श्रेष्ठं वय्कःया योगदानयात न्ह्यथसें बिचा: प्वंका दीगु खः ।
लुमन्ति ज्याझ्वलय् वीरप्रसाद भंसाली, नरेनमान महर्जन व उर्मिला डंगोलं मे, चिनाखँ व चिबाखं न्यंका दीगु ख: । विराटया छ्याञ्जे प्रदीपरत्न शाक्यं न्ह्याका दीगु मुंज्याय् रामशेखर लुमन्ति दबूया दुज: न्हूछेंभक्त कवांनं सुभाय् बिया दीगु ख: ।
च्वमि गोविन्दमान श्रेष्ठ ७४ दँया बैंसय् वंगु तछलाथ्वः दसमि, मंगलबार (जेठ १६ गते) मदुगु खः।
