पाकिस्तान सुपर लिग (पीएसएल) को ११औँ संस्करण यस पटक दर्शकविनाको खाली रङ्गशालामा सञ्चालन हुने भएको छ।
मध्यपूर्वमा बढ्दो तनाव, सुरक्षा संवेदनशीलता र इन्धन सङ्कटलाई मध्यनजर गर्दै पाकिस्तान क्रिकेट बोर्ड (पीसीबी) ले प्रतियोगितालाई कराँची र लाहोर गरी दुई सहरमा मात्र सीमित गर्ने निर्णय गरेको छ।
यसअघि ६ सहरमा गर्ने भनिएको पूर्वयोजना र लाहोरमा तय भएको भव्य उद्घाटन समारोह समेत रद्द गरिएको छ।
पीसीबी अध्यक्ष मोहसिन नकवीले वर्तमान परिस्थितिमा दर्शकको सुरक्षा नै प्राथमिकता रहेको बताउनुभएको छ।
बोर्डले टिकट काटिसकेका दर्शकलाई रकम फिर्ता गर्ने र फ्रेन्चाइज टोलीहरूको नोक्सानीको क्षतिपूर्ति दिने प्रतिबद्धता जनाएको छ।
आगामी बिहीबार मार्च २६ देखि मे ३ सम्म चल्ने यस प्रतियोगितामा पहिलो पटक आठ टोली सहभागी हुँदैछन्, जसमा नेपाली अलराउन्डर दीपेन्द्रसिंह ऐरी इस्लामाबाद युनाइटेडबाट मैदान उत्रिनेछन्।
