राष्ट्रिय नेवाः खलः इजराइलया नकिंकथं ज्योति प्रधानयात सर्वसम्मतं ल्यःगु दु । सुक्रबार तेलअभिभया यसोदामाला ४४ या हलय् जूगु नेवाः खलःया १२ क्वःगु अधिवेशन व पलिस्था न्हिया ज्याझ्वलय् प्रधानयात नकिं पदय् सर्वसम्मतकथं ल्यःगु खः ।
अथे हे वरिष्ठ न्वकुली टंक श्रेष्ठ, न्हापांम्ह न्वकू अमिरा थापा श्रेष्ठ, मूछ्यान्जेय् प्रकाश श्रेष्ठ, छ्यान्जेय् राजु श्रेष्ठयात ल्यःगु दु। अथे हे दांभरिनय् प्रवीण श्रेष्ठ, ल्यू दांभरिनय् सरस्वती श्रेष्ठ अले दुजलय् प्रियङ्का श्रेष्ठ, समीर श्रेष्ठ व राज प्रजापतियात ल्यःगु दु ।
न्हू ल्यःम्ह प्रधानं निवर्तमान नकिं राजकुमारी श्रेष्ठ व वय्कःया ज्यासना पुचःयात सुभाय् द्यछासे थःपिनि कार्यकालय् इजराइलय् दुपिं नेवाः समुदाययात छप्पँ छधी यायेगु विश्वास प्वंका दिल ।
थ्व हे दथुइ राष्ट्रिय नेवाः खलः इजराइलया नकिं पदय् ज्योति प्रधान सर्वसम्मत जुयादीगुली वर्ल्ड नेवाः अर्गनाइजेशनया नायः संयुक्त श्रेष्ठं भिन्तुना बियादिसे सफल कार्यकालया मन्तुना नं प्वंकादिल ।
