‘नेवाः बौद्ध हाइकु धें धें बल्लाः कासा’या लिच्वः घोषणालिसें ताःलाःपिन्त सिरपाः लःल्हायेगु ज्याझ्वः जूगु दु । लुम्बिनी बौद्ध विश्व विद्यालयया ग्वाहालिं जूगु ‘नेवाः बौद्ध हाइकु धें धें बल्लाः कासा’या लिच्वः घोषणालिसें ताःलाःपिन्त सिरपाः लःल्हायेगु ज्याझ्वः यलया सातोआकि स्मृति भवनय् सोमबाः जूगु खः ।
नेपाल प्रज्ञा प्रतिष्ठानया उपकुलपति बिमल निभाःया मूपाहांसुइ जूगु ज्याझ्वलय् ‘बौद्ध हाइकु’ सफूया विमोचन नं जूगु खः। लुम्बिनी बौद्ध विश्व विद्यालयया डिन डा. माणिक रत्न शाक्यया नायःसुइ न्ह्याःगु ज्याझ्वलय् नेवाः हाइकु ख्यःया कजि सुरेश प्रधानं सकसितं लसकुस यानादिसे थःगु खँ तयादीगु खः ।
ज्याझ्वलय् धें धें बल्लाः कासाया निर्णायक डा पुष्पराज राजकर्णिकार, डा वज्रराज शाक्य व ध्रुब मधिकर्मिया लिसें लुम्बिनी बौद्ध विश्व विद्यालयया रजिष्ट्रार डा. तिलक राम आचार्य व डा चुन्दा बज्राचार्यपिन्सं नं बौद्ध हाइकुयात कयाः थःपिनि नुगःखँ तयादीगु खः ।
ज्याझ्वलय् धें धें बल्लाखय् ताःलाना दीपिं मध्यय् उत्कृष्ट न्याम्ह हाइजिनपिं विमल प्रभा बज्राचार्य, मिलन शाक्य, रामेश्वर श्रेष्ठ ‘जलन’, रामेश्वर मिश्रण श्रेष्ठ, रिता महर्जन किपू लिसें हःपाः सिरपाः त्याकादीपिं आनन्द सिद्धि तुलाधर, बद्रि वेदना, बुद्धलक्ष्मी बज्राचार्य, दिब्या ताम्राकार, प्रदीप आर तुलाधर, राजु नापित, रिता महर्जन व तेजकृष्ण श्रेष्ठपिन्त प्रज्ञा प्रतिष्ठानया उपकुलपति बिमल निभाःपाखें सिरपाः इनेज्या जूगु खः ।
ज्याझ्वलय् थी थी पाहांपिं व धें धें बल्लाः कासाय् ग्वाहालि यानादीपिन्त मतिनाया चिं नं लःल्हागु खः । ज्याझ्वःया ग्वसाः नेवाः हाइकु ख्यःपाखें जूगु खः ।
