नेपालभाषा शिक्षाविद्, भाषाविद् लिसें लिपि विशेषज्ञ इन्जीनियर देवदास मानन्धर मन्त । वय्कः म्हिगः आइतबार ७० दँया बैशय् सनिलय् येँया नमन केयर सेन्टरय् मदुगु वय्कःया परिवारं धागु दु ।
निदँति न्ह्यः वय्कःयात ब्रेन ह्येमरेज जूगु खःसा अनंलिपा सुसाःकुसाः यायेगु निंतिं नमन केयर सेन्टरय् तयातःगु खः । मदुम्ह मानन्धरया अन्तिम संस्कार वइगु बुधबार जुइगु वय्कःया परिवारं धागु दु। न्हूदँ समारोह समितिया पुलांम्ह सचिवालय दुजः नं जुयादीम्ह वय्क न्हूदँया तिथिपौ पिथनाया संयोजक जुयादी। वय्कः नांजाःम्ह भाषासेवी, उद्योगपति, राजनीतिज्ञ मदुम्ह लक्ष्मीदास मानन्धरया तःधिकःम्ह काय् जुयादी।
