यें -भाषासेवी, शिक्षाविद्, न्हूदँ राष्ट्रिय समारोह समितिया सचिवालय दुजः इ. देवदास मानन्धरया लुमन्तिइ जूमय् ज्याझ्वः याइगु जूगु दु । अमेरिकाय् च्वनाः न्ह्याका वयाच्वंगु श्रष्टा समाज व लक्ष्मीदास मानन्धर लुमन्ति पुचःया ग्वसालय् वइगु सनिबार जूम ज्याझ्वः जुइत्यंगु खः ।
वइगु ने.सं. ११४४ सिल्लाथ्वः अस्तमि, सनिबार (फागुन ५ गते) बहनी ८ ताः इलय् वय्कःया लुमन्तिइ थी थी व्यक्तिपिन्सं जूम ज्याझ्वःपाखें थःथःगु नुगःखँ प्वंकेत्यंगु दु । श्रष्टा समाजं ब्यूगु जानकारीकथं जूम ज्याझ्वः कवयित्री प्रतिसरा मानन्धर व पत्रकार सिल्भिया राजोपाध्यायं न्ह्याकेत्यंगु दुसा ज्याझ्वलय् वक्ताकथं जनकवि दुर्गालाल श्रेष्ठ, डा. त्रिरत्न मानन्धर, मल्ल के. सुन्दर, पूर्वमन्त्री जीवनराम श्रेष्ठ,कोडन्य भन्ते, विष्णु चित्रकार व श्रष्टा समाजया प्रभात दीक्षितपिन्त ब्वनातःगु दु ।
इ. देवदास मानन्धर वंगु स्वलान्ह्यः ब्रेन हेमरेजया वासः यायेगु झ्वलय् ७५ दँया बैंसय् मदुगु खः । वय्कः नांजाःम्ह भाषासेवी, उद्योगपति, धर्मसेवी, राजनीतिज्ञ लक्ष्मीदास मानन्धरया तःधिकःम्ह काय् जुयादी।
