यल – यलय् बुंगद्यःया जात्राया निंतिं थनिंनिसें रथ दयेकेगु ज्या न्ह्याःगु दु। दँय्दसं चौलागाः द्वितियाखुन्हु रथ दयेकेगु ज्या न्ह्याकेगु चलन दु । थनिंनिसें रथ दयेकेगु ज्या पूच्वय् न्ह्याःगु खँ रथ दयेकेज्याया सिँज्या कःमि नायः दिल कुमार बाराहिं कनादिल ।
म्हिगः बुंगद्यःया न्हवंलिसें रथ दयेकेत हामोकी तानाः साइत पुजा नं याःगु खः । दँय्दसं बुंगद्यःया न्हवं याःखुन्हु हे रथ दयेकेत साइत पुजा यायेमाःगु चलन दु ।
थ्व हे दथुइ म्हिगः न्हवं यायेधुंकाः बुंगद्यःयात गुप्तबासय् बिज्याकुगु दु । न्हवं लिपा छवाःतक द्यःयात गुप्तबास तयातइसा वइगु अस्तमिखुन्हु द्यःयात गुप्तबासं पिकयाः निभाः पाकी ।
बुंगद्यःयात वइगु बछलाथ्वः पारु, सुक्रबार (बैशाख ८ गते)खुन्हु रथय् बिज्याकाः वइगु बछलाथ्वः चौथि, सोमबार (बैशाख ११ गते)निसें रथयात्रा शुरु जुइ ।
