प्रा.प्रेमशान्ति तुलाधरपाखें उदाय् समाजया माःमाःगु न्हियांन्हिथंया ज्याखँत न्ह्याकेत खर्च याय्गु नितिं न्यागू लखया अकलमान तुलाधर अक्षय कोष स्वनेगु बचं उदाय् समाजया निइक्वःगु दँ मुँज्या झ्वलय् वंगु चैत २५ गते शनिवाः बियादीगु दु । थुगु न्यागू लखया कोषपाखें वःगु व्याज मध्ये ९० प्रतिशत दां उदाय् समाजया ज्याकुथि संचालनया लिसें माःगु ज्या न्ह्याकेत खर्च यायगु व मेगु ल्यं दुगु १० प्रतिशत व्याज अक्षय कोषय् हे तनेगु कथं व्यवस्था याय्त्यंगु दु ।
उदाय् समाजया दँ मुँज्याय् थःगु नुगः खँ प्वंकेगु झ्वलय् थौंया इलय् छुं नं कथंया ज्याखँत न्ह्याकेत भावुकतां जक मगाःगु खँय् बः बियादिसें अर्थया नं उलि हे आवश्यक जु धयादीगु दु । थुज्यागु हे यर्थाथतायात वाःचाय्का उदाय् समाजया थःगुृ हे छगू थातं कोष दुसा अफिस संचालनया नापं मेमेगु ज्याखँत उदायु समाजं निरन्तररुपं न्ह्याके फइ धकाः नं मनं तुनादीगु दु ।
वय्कलं थः दिवंगत जुयादीम्ह जहान अकलमान तुलाधरया नामं उदाय्ु समाजया खातायु थुगु दां स्वनेगु मनं तुंगु दु । थः स्यान्यापिं लुमंकेत मेमेगुलिइ खर्च याय्गु स्वयाः उदाय् समाजया रचनात्मक ज्याखँ न्ह्याकेत खर्च याय्गु हे अप्वः पायछि जुइ धैगु नं वयकः मय्जु तुलाधरं मनं तुनादीगु दु । आः वइगु दँ मुंज्यायु थ्व कोष स्वनेगु नितिं चेक हस्तान्तरण याय्गु खँ नं कनादीगु दु ।
उदाय् समाजया दँ मुंज्याबलय् वयकः मय्जु तुलाधरया जहान अकलमान तुलाधरया पुण्य लुमन्तिकथं दँय् छकः मदुम्ह अकलमानया किपाय् समाजया नायोपाखें छमाः स्वांमाः तथा परिवारपाखें छमाः स्वांमा क्वखाय्के दइगु व्यवस्था याना बियादीत नं इनाप यानादीगु दु ।
