येंया वँतु मानन्धर त्वा:या बाका देय् आजु सना:गुथि खल:या नीन्याक्व:गु त:मुंज्या जूगु दु। गुथिया थाकुलि शिव मानन्धरया मुंज्यानाय:सुइ थौं थँबही, गल्क्वपाखाया प्रज्ञा स्कुलयागु ख्यलय् जूगु त:मुंज्याय् वय्कःपिन्सं भाषा आन्दोलनया धिसिला:गु थांकथं नाःजाःम्ह ख्यालः क्षेत्रया नासलं लीम्ह कलाकार अले निर्देशक गणेश साय्मियात हंगु खः। बागमती प्रदेशया सांसद शैलेन्द्र मान बाज्राचार्यं कलाकार अले निर्देशक गणेश साय्मियात पलिगा व हनापौ लःल्हानाः हनादीगु खः।
अथेहे ज्याझ्वलय् गुथिया ल्याम्ह पुस्तायात हःपाः बीगु तातुनाः शिक्षा ख्यःया थी थी तगिमय् नापं मेमेगु बिषयस ताःलापिं मस्तय्तनं हनेगंगु खः। ज्याझ्वलय्१२ तगिमय ताः लापिं, स्नातकोत्तर तगिमय् ताः लापिं अले गुथिया छयाञ्जे दिपक नारायण मानन्धरयात प्रशंसा पत्रं सम्मान याःगु खः।
यें महानगरपालिकाया वडा ल्याः २४ या नायः बिनोद राजभण्डारी, हनुमान ढोका दरबार संरक्षण कार्यक्रमया नायः चन्द्र गोपाल, केन्द्रीय मानन्धर संघया उप सभापति बद्रि नारायण मानन्धर, स्कुलया प्रधानध्यापक सत्य नारायण मानन्धरया विशेष उपस्थिति दुगु खः। त:मूज्या ज्यासना पुचया दुज: बिजय मानन्धरं न्ह्याका दीगु खः ।
ज्याझ्वलय् थी थी पाहांपिन्सं त:मुंज्याया सफलताया कामना यासें थःथ:गु नुगःया खँ तयेगु झ्वलय् झ्वलय् थौंकन्हय् मस्त यक्व धया थें बिदेशय् वनानाच्वंगु बारे च्यूताः प्वंकादीगु खः ।
गुथिया छ्याञ्जेपाखें लसकुस यानाः सुरु जूगु ज्याझ्वलय् बाका देय् आजुया पुजा यासे ज्यासना पुचया दुज: जयओमपाखें सुभाय् न्वचु तयाः ज्याझ्वः क्वचाःगु खः । त:मुंज्यायात स्वब्वय् थलाः न्ह्याकुगु ज्याझ्व:या न्हापांगु ज्याझ्व: धुंकाः बन्द सत्रया ज्याया नापं साँस्कृतिक ज्या यानाः क्वचाःगु खः ।
