जनकवि दुर्गालाल श्रेष्ठया चिनाखँ वाचनलिसें लसय् हंगु चिनाखँ स्यनेकने ज्याझ्वः क्वचाल । नेपालभाषा साहित्य तःमुंज्या तोखाया ग्वसालय् निन्हु यंकं लसय् हंगु चिनाखँ स्यनेकने ज्याझ्वः जूगु दु । ज्याझ्वः वंगु ने.सं. ११४४ प्वहेलागाः पन्चमि, बुधबार व खस्थि, बसुबार (माघ १७ व १८ गते) तोखा देसय् जूगु खः । नेवाः छन्द पुनर्जागरण अभियानया नायः लोककवि राजभाइ जकःमिं प्रशिक्षण बियादीगु स्यनेकने ज्याझ्वलय् तोखा व स्वनिगःया थी थी थाय्या २० म्ह प्रशिक्षार्थिपिन्सं ब्वति कयादीगु खः ।
प्रशिक्षणया अन्तिम चरणय् जनकवि दुर्गालाल श्रेष्ठया भिं उसाँय्या कामना यासे वय्कलं च्वयादीगु हस्ताक्षर, चिनियाम्ह किसिचा व चखुंचा ध्वग्गी सफूया २० पु कविता प्रशिक्षार्थिपिन्स वाचन यानादीगु खः ।
नेपालभाषा साहित्य तःमुंज्या तोखाया नायः काशीलाल डंगोलया सभापतित्वय् जूगु प्रशिक्षणया समापन ज्याझ्वलय् प्रशिक्षक लोककवि राजभाइ जकःमिं महाकवि सिद्धिदास महाजुपिन्सं शुरु यानादीगु छन्द कविता च्वज्यायात निरन्तरता बीगु तातुनाः थःपिनिसं नेवाः छन्द पुनर्जागरण अभियान न्ह्याका वयाच्वनागु खँ कनादिल ।
तःमुंज्याया संस्थापक छ्याञ्जे व प्रशिक्षणया प्रशिक्षार्थि राजवीर डंगोलं थ्व प्रशिक्षणय् छन्द कला स्यनेकनेया नापनापं जनकवि दुर्गालालया चिनाखँ वाचन याये खंगुलिं सकल प्रशिक्षर्थिपिं गौरव ताःगु खँ न्ह्यथना दिल । तःमुंज्याया दुजः शैलेश डंगोलं न्ह्याकादीगु समापन ज्याझ्वलय् जकःमिं सकल प्रशिक्षार्थिपिन्त दसिपौ नं लःल्हाना दीगु खः ।
