अमेरिकाया डिसि महानगर लागाय् धिमे व मादल थायेगु तालिम ब्यूगु दु। डिसि लागाय् अमेरिकाया नेपाःमि समुदायया इतिहासय् संभवत न्हापां खुसी अमेरिकाय् बूपिं, ब्वलंपिं मस्त व अभिभावक लिसें मेपि मनूतय्त धिमे व मादल थायेगु तालिम ब्यूगु खः।
ल्याय्म्ह अमेरिका गुथिं ग्वसालय् भर्जिनियाया फेयरफ्याक्सय् च्वंगु छगू सफूकुथिइ जूगु कार्यशाला ज्याझ्वलय् म्ह्व निं १०० म्हस्यां ब्वति काःगु खः । ज्याझ्वलय् ब्वति कायेत मेरिल्यान्ड, भर्जिनिया व डिसि लागाया थी थी शहरं मस्त वःगु खः ।
कार्यशालाया मू स्यनामि पुस्कर प्रजापतिं निघौत्याति ईतक मादल व धिमे स्यनादीगु खः । संस्थाया मू समन्वय यानादीम्ह प्रजापतिं नेपाःमिया भाय्, तजिलजि, कला, म्हसीका व नेपाःया वाद्यवादन लिसेंया खँय् निगूगु पुस्तायापिन्त जानकारी बियादिसें नेपाःमिया म्हसीकाया खँय् ध्वाथुइका दीगु खः ।
ज्याझ्वलय् मादल व धिमे थायेगु स्यनेगु ज्याय् ग्वाहालि व समन्वय पुचःया दुजःत अनिश खासा, दीपिका एस राजभण्डारी, मनि श्रेष्ठ, मनिष महर्जन, निरन्जन श्रेष्ठ, प्रिन्स प्रजापति, पुस्कर प्रजापति, अशिस चक्रधर, रिंकु गुरुङ्ग सिक्राकार, सजना महर्जन, सकुन्तला श्रेष्ठ कर्माचार्य, मनिष श्रेष्ठ, सुबिन श्रेष्ठ, सिचु माली,अनु श्रेष्ठ, सुगन्ध श्रेष्ठ व सुजी डंगोलं यानादीगु खः ।
थन हे ब्वलंम्ह येजु श्रेष्ठं मादल व धिमे बाजं लिसें सारंगी थानाः ३ पु नेपाली मे न्ह्यब्वयादीगु खः । वय्कयात मादलय् जनक श्रेष्ठ व धिमेय् पुस्कर प्रजापतिं ग्वाहालि यानादीगु खः । लिसें थन हे बूम्ह एडन सिख्राकारं नेपाली मेय् पियानो थानाः न्ह्यब्वदीगु खः । थुकी मनि श्रेष्ठं मादलय् ग्वाहालि यानादीगु खः । कार्यशालाय् वन्जला प्रजापति व लकस प्रजापतिं नं धिमे थानादीगु खः ।
ज्याझ्वलय् गुथिया सुगन्ध श्रेष्ठं सुभाय् द्यछाया दीगु खः । समिधा श्रेष्ठ न्ह्याकादीगु ज्याझ्वलय् सिचु मालिं संस्थाया म्हसिका बियादीगु खः ।
म्ह्व निं ४० गः मादल व १० गः धिमे हःगु उगु कार्यशालाय् सकसिनं तसकं न्ह्यइपुकाः सक्रिय रुपं ब्वति काःगु खः । कार्यशालाय् मस्तय् छेँजःपिं व गुथिइ दुथ्याना दीपिं दुजःतय्सं सक्रिय रुपं कार्यशालाय् तःधंगु भूमिका म्हितादीगु खः । सार्वजनिक रुपय् सार्वजनिक थासय् हे ज्याझ्वःया ग्वसाः ग्वःगुली समुदाय तसकं लय्ताःगु दु।
थ्व हे झ्वलय्, वइगु नेपाल संबत ११४४ चौलाथ्वः द्वादसि, सनिबार (अप्रिल २०) खुन्हु मनाससय् बिस्काः जात्रा हनीगु जूगु दु ।ज्याझ्वलय उपस्थित NOA, नेवाः अर्गनाईजेसन अफ अमेरिकाया नायः भाजु महिन्द्र प्रधान, लिपांम्ह न्वकु भाजु दिवाकर धौभदेल, WNO, हलिं नेवाः दबु या पुलाम्ह दॉभरी भाजु जयम्बु रंजित, रामेछाप नेवाः संघया नायः भाजु दिनेस राजभण्दारी, परमानन्द श्रेष्ठ पिसं नं थथगु मन्तब्य बियादिगु ख ।
