अमेरिकाया भर्जिनिया राज्यया मनासस शहरय् वंगु चौलाथ्वः द्वादसि, सनिबार (अप्रिल २०)खुन्हु तःजिक स्वक्वःगु बिस्काः जात्रा न्यायेकूगु दु । ल्याय्म्ह अमेरिका गुथिं ग्वसाः ग्वःगु उगु ज्याझ्वः मनासस शहरया स्प्लाश डाउन वाटर पार्कय् याःगु खः । जात्रा सुरु जुइ न्ह्यः दकलय् न्हापां गनेद्यःयात पुजा याःगु खः । वयांल्यू थी थी तजिलजि न्ह्यब्वइगु कथंया मस्तय्गु लिसेंया थी थी जातजातिया प्याखंं न्ह्यब्वःगु खः ।
ल्याय्म्ह अमेरिका गुथिया नायः पुष्कर प्रजापतिं लसकुस न्वचु तयादीगुया लिसें सुभाय् नं द्यछाया दीगु खः । अथे हे पाहांया कथं कार्यकारी समितिया नापं न्यूयोर्कं झायादीम्ह नेवाः नखःया नायः नरेश मान शाक्य जात्राय् ब्वति कयादीगु व नुगःखँ नं तयादीगु खः ।
जात्रा ५.३० ताः इलय् सुरु जुयाः अथे हे छघौत्या तक न्ह्याःगु खः । उगु सिन्हः जात्राय् सकसिनं खः क्वब्यूगु खः । ब्वति कयादीपिं सकसिनं बाजंया लिसें सिन्हः जात्रा यानाः चाःह्यूगु खः । थुगु ज्याझ्वलय् खुसः स्वयां अप्वः मनूतसं ब्वति काःगु खः । अन थी थी सांस्कृतिक ज्याझ्वःया लिपा हनापौ तकं इंगु खः । हनापौ इनेधुंकाः जात्रा सुरु जूगु व सिन्हः जात्रा ५.३० ताः इलय् सुरु जुयाः अथे हे छघौत्या ईतक न्ह्याःगु खः ।
सिन्हः जात्राया लिसें भर्जिनियाय् दयेकूगु रथ मिसा मिजंतसें पालंपाः क्वब्यूगु खः । अन झायादीपिं फुक्क धयाथें नेवाः समुदायं परम्परागत वसः पुनावःगु खः । अन थः छेँजःलिसे वःपिं निगूगु पुस्ताया मस्तय्सं तकं तसकं न्ह्यइपुकुगु खः । उगु जात्राय् धिमे प्याखं, कुमारी प्याखं, सारंगी फ्यूजन (मिश्रित), सांगीतिक न्ह्यब्वया, पारम्परिक प्याखंया लिसें मेमेगु ज्याझ्वःत न्ह्यब्वःगु खः । जात्राय् मस्तय्त न्ह्यइपुकेया निंतिं ख्वाः चित्रकला (फेस पेन्टिङ्ग) व शिल्पकला अले च्वकिपा (पेन्टिङ्ग)लिसेंया ज्याझ्वःया ग्वसाः ग्वःगु खः। ब्वति कयादीपिं व पाहांपिन्त समय्बजि व भ्वय्या नं प्रबन्ध याःगु खः ।
विक्रम संबतकथंया न्हूदँ वयेवं सुरु जुइगु ऐतिहासिक व सांस्कृतिक महत्वं जाःगु बिस्काः जात्रा च्याचा गुन्हुतक तःजिक ख्वपय् हनीसा थिमिइ स्वन्हुतक हनी । थुगु जात्रा अप्वः धया थें ख्वप, धापासि, तोखा व थिमिइ दँपतिकं हनी ।
