हलिंन्यंक च्वनाच्वंपिं नेवाः समुदाययात छप्पँ छधी यायेगु ता तयाः पलिस्था जूगु वर्ल्ड नेवाः अर्गनाइलेशन (हलिं नेवाः दबू)पाखें जूमया माध्यमं न्हिथं न्ह्यानाच्वंगु ज्याझ्वः वर्ल्ड डेली ब्रोडकास्ट (WDB) १००० (द्वःछि) ब्व थ्यंगु लसताय् वंगु मंगलबार छगू विशेष ज्याझ्वः जुल ।
डब्लुएनओया केन्द्रीय नायः संयुक्त श्रेष्ठया नायःसुइ जूगु उगु विशष ज्याझ्वःया उलेज्या येँ महानगर पालिकाया उपमेयर सुनिता डंगोलं डिजिटलकथं यानादीगु खः, वय्कः WNO या पुलांम्ह युथ एम्बेसेडर व न्हापाया प्रस्तोता नं जुयादी । वय्कलं थःगु नुगःखँ तयेगु झ्वलय् डब्लुडिबि ज्याझ्वलं नेवाः समुदाययात छप्पँ छधी यायेत न्ह्यथनेबहःगु भूमिका म्हितूगु धकाः थःगु धापू तयादिल । डब्लुएनओया पुलांम्ह नायः सिजन श्रेष्ठं डब्लुडिबि गथे यानाः सुरु जुल व छु गुजाःगु हात्थ्यात वयावं च्वन धकाः जानकारि बियादीगु खः ।
डब्लुएनओया पलिस्था नायः डा. बालगोपाल श्रेष्ठं डब्लुडिबिं द्वःछि स्वयां अप्वः मनूतय्गु खँयात ब्यवस्थित यानाः डिजिटलकथं अभिलेखिकरण यायेधुंकूगु धयादिसे थुकिया महत्त्वया खँय् थःगु बिचाः प्वंकादिल । डब्लुएनओया ज्यासना पुचःया दुजः व डब्लुडिबिया ज्याझ्वः न्ह्याकामि डा. नरेश मान शाक्यं डब्लुडिबिइ खँल्हाबल्हा यानादीपिं पाहांपिनि लिङ्ग, लागा व विषय लिसेंया स्वापू दुगु थी थी जनसांख्यिक तथ्यांक न्ह्यब्वया दीगु खः ।
अथे हे ज्याझ्वलय् खँल्हाबल्हाय् दुथ्याःपिं पाहांपिं मध्यय् ल्ययाः सुं सुं पाहांपिं म्हसीकेकथं नेवाः म्हसीके कासा नं म्हितुकूगु खः । जूमय् ब्वति कयादीपिं व फेसबुक लाइभ स्वया च्वनादीपिं स्वकुमिपिनिपाखें वःगु लिसः मध्यय् दकलय् अप्वः लिसः बियादीम्ह अमेरिकाया सुशील ताम्राकारयात त्याःगु घोषणा याःगु खः ।
ज्याझ्वलय् डब्लुडिबिया अवधारणा व विकासकर्ता दीपेश शाक्य, नियमित ब्वति कयादीपिं पौभाः साय्मि, डा. सुशील ताम्राकार, डा. लोचन मानन्धर, अञ्जना ताम्राकार, द्वारिका राजभण्डारी, विद्या दली लिसेंया मनूतय्सं थःथःपिनि नुगःखँ तयादीगु खः । ज्याझ्वलय् नेवाः देय् दबूया नायः पवित्र बज्राचार्य, नेवाः पासा पुचः अमेरिकाय्या नायः मनोहर श्रेष्ठ, नेवाः अर्गनाइजेशन अफ अमेरिकाया नायः महिन्द्रा प्रधान व डब्लुडिबिइ खँल्हाबल्हा ब्याकादी धुंकूपिं पाहांपिं लिसें मेमेपिं मनूतय्सं नं ब्वति कयाद्यूगु खः ।
उगु ज्याझ्वलय् डब्लुडिबिया ज्याझ्वः न्ह्याकामि व नियमित ब्वति कयादीपिन्त हनापौ नं लःल्हाःगु खःसा डब्लुडिबिइ खँल्हाबल्हा ब्याकादीपिं पाहांपिनिगु किपा लिसेंया पोष्टर नं न्ह्यब्वयेगु ज्या जूगु खः ।
जूम व फेसबुक लाइभपाखें प्रसारण जूगु उगु विशेष ज्याझ्वलय् जूमय् ब्वति कयादीपिं १५० म्ह स्वयां अप्वः मनूतय् दथुइ गोला प्रथा यानाः स्वम्हसित सिरपाः ब्यूगु खः । सिरपाः त्याकादीपिन्त डिजिटल पालपाखें प्रायोजित सिरपाः बीगु धकाः डब्लुएनओं धाःगु दु । थुगु विशेष ज्याझ्वः डब्लुडिबिया ज्याझ्वः न्ह्याकामि व यूथ एमबेसेडर नीतु डंगोलं न्ह्याकादीगु खः ।
