नेपालभाषा व वुद्ध धर्मया निंतिं थःगु मुक्कं जीवन पानादीम्ह नेवाः महारथी भाषा थुवाः धर्मादित्य धर्माचार्यया सच्छि व नीनिक्वःगु जन्मन्हि हलिं नेवाः दबुलिं तःजिक हंगु दु। वंगु जेठ ११ खुन्हु जूमपाखें जूगु ज्याझ्वःया उलेज्या लोककविलिसें ज्याझ्वःया कजि राजभाइ जकःमिंं धर्मादित्यया किपाय् खादा क्वखायेका यानादीसें धर्मादित्यया जीवनी कःघानातःगु चिनाखँ न्यंकादीगु खः ।
ज्याझ्वयाः मू वक्ता नेपालभाषा आकादेमीया दुज छयाञ्जेंलिसें साहित्यकार डा. पुष्पराज राजकर्णिकारंं धर्मादित्य धर्माचार्य नं नेपालभाषाया छम्ह थां खः धयादिसे वय्कःयात नं दुथ्याकाः झीसं न्यागः थांकथं हनेमाः धयादिल । ज्याझ्वलय् हलिं नेवाः दबू नेपाः च्याप्टरया नायःलिसें थुगुसीया अन्तर्राष्टिय मातृभाषा दिवसया कजि सुरेन्द्र भक्त श्रेष्ठंं मातृभाषा पत्रकारिता सच्छिदँ थ्यंगु लसताय् धर्मादित्य धर्माचार्यया व्यक्तित्व अन्तर्राष्टिय स्तरय् थ्यंक प्रचारप्रसार यायेगु ग्वसाः दुगु खँ कनादिल ।
धर्मादित्यया छय् सृंजना नेवाः नंं थः बाज्या धर्मादित्यं नेवाः जाति, भाषा व देय्या निंतिं योगदान याानावंगुलिं परिवारयात तसकं गौरव ताः धयादिल । हलिं नेवाः दबूया युथ एम्वेसदर नितु डंगोलंं न्ह्याकादीगु ज्याझ्वलय् दबूया न्वकू समन्त वज्राचार्यं सकसितं सुभाय् देछासे हलिं नेवाः दबुलिं नेपालभाषा व जाति ख्यलय् जीवन पानादीपिं महारथिपिनिगु जन्म न्हिं हनेगु झ्वलय् भाषा थुवाः धर्मादित्य धर्माचार्यया १२२ क्वःगु जन्म न्हि हनेखंगुुलिं लसता प्वंकादिल ।
