हलिं नेवाः दबूलिं कवि, भाषा सेवी व सफू धुकू थुवाः नातिवज्र वज्राचार्यया चय्खुक्वःगु वुन्हि हंगु दु। वंगु तछलागाः दशमी (असार १७ गते) जूम प्रविधि मदुम्ह नाति वज्रया चय्खुक्वःगु वुन्हि हंंगु खः।
वय्कया जहान भाषासेवी प्रमिला वज्राचार्यं वयकया किपातय् खादा क्वखायेकाः न्ह्यागु ज्याझ्वलय् लोककवि राजभाइ जकःमिंं प्रतिभा साहित्यिक परिवार न्ह्याकेया लागी कवि नाति बजं यानादीगु योगदानया खँ न्ह्यथसें वय्कया जीवनीया लिधंसाय् च्वयातःगु चिनाखँ ब्वनाःदीगु खः ।
ज्याझ्वलय् साहित्यकारलिसें भाषासेवी शान्त राज शाक्यंं नाति वज्रया थीथी पक्षयात कयाः न्वं वानादीगु झ्वलय् वय्क झी कवि चित्तधर हृदयया अतिकं यःम्ह व्यक्ति जूगु धासें वयकया इहिपाःया इलय् चित्तधरंं लुँया अंगू छपाः, टप छज्वः व घरि छगः बियादीगु खँ न्ह्यथना दिगु खः ।
अथेहे च्वमिलिसें अन्वेषक वसन्त महर्जनंं कवि नाति व्रज कवि, भाषा सेवी व सफूधुकू थुवाः जक मखु छम्ह वौद्ध धर्मया सेवक नं खः धासें नाति व्रजं पसलय् च्वच्वं यक्व साहित्यकार व भाषा सेवीपिं जन्म याःगु खँ न्ह्यथनादिल ।
वरिष्ठ संगीतकःमि मनराजा नकःमिंं नाति वज्रया म्ये पक्षया खँय् थःगु नुगः खँ तसे वय्कलंं च्वयादीगु पिहां मवःनिगु स्वपु म्ये न्यंकादीगु खः ।
ज्याझ्वलय् हलिं नेवाः दबूया न्हापायाम्ह नायः सीजन श्रेष्ठंं तःदँ न्ह्य कयातःगु आपुलुगुु भिडिओ व सफू सहकारीं नाति वज्रयात हंगुु ज्याझ्वःया भिडिओ नं क्यनादीगु खः ।
ज्याझवलय् डा शुशिल ताम्राकार, हलिं नेवाः दबूया केन्द्रीय न्वकू शाक्य सुरेनं नाति वज्रया योगदानया बारे नुगः खँ प्वंकादीगु खः ।
नुगः खँ तयेगु झ्वलय् प्रमिला वज्राचार्यं थुगु ज्याझ्वः न्ह्याकादीगुलिं परिवार पाखें कृतज्ञता देछाना दिल ।
अथे हे नाति वज्रया म्ह्याय् नःलि बज्राचार्यं थः अबु च्वमिजक मखु सुचिकाः ज्या, सिँकःमि ज्या, स्वां ह्वय्के ज्याय् नं तसकं निपुर्णम्ह व्यक्ति जूगु धयादिल । नापं वय्कलं गरीवया कारणं बजारय् न्यानाः मखु मोहनी थें जाःगु नखः बलय् वय्कलं हे लाकां सुयाः, लँ सुयाः थःपिन्त बीगु खँ न्ह्यथनादिल ।
सुभाय् न्वचुया झ्वलय् दबूया नेपाः च्याप्टरया नायः सुरेन्द्र भक्त श्रेष्ठंं कवि नाति वज्रजुया प्रेरणां थः व्यावसायिक पत्रकार ख्यलय् न्ह्याः वयेत हःपाः जूगु खँ न्ह्यथना दिल ।
हलिं नेवाः दबूया मूदुजःलिसें डब्लूडिविया कजि डा नरेश शाक्यंं न्ह्याकादीगु ज्याझ्वलय् नेपाःया नापनापं विश्वया थीथी देय्या मनूतसें ब्वति कयादीगु खः ।
