नारायणगोपालया जीवनया थथ्याः–क्वथ्याःनिसें अले नारायणगोपालनिसें स्वरसम्राट नारायणगोपाल तकया यात्राया थी थी पक्षयात कःघानाः खय् भासं च्वयातःगु सफू ‘स्वरसम्राट नारायणगोपाल’ पितब्वज्या जूगु दु ।
संकिपा निर्देशक, निर्माता व च्वमिया कथं नं म्हसीका दुम्ह प्रकाश साय्मिं च्वयादीगु उगु सफू मंगलबारखुन्हु यलय् ग्वसाः ग्वःगु छगू ज्याझ्वःया दथुइ पितब्वज्या जूगु खः । सफूया पितब्वज्या प्राध्यापक केदारभक्त माथेमा, संगीतकार कर्म योञ्जन, मेच्वमि कालीप्रसाद रिजाल, संगीतकःमि सिके रसाइली, कलाकारपिं नीर शाह, मदनकृष्ण श्रेष्ठ, हरिवंश आचार्य, वसुन्धरा भूषाल लिसेंया मनूतय्सं यानादीगु खः ।
सफूया पितब्वज्या धुंकाः चीहाकलं नुगःखँ प्वंकेगु झ्वलय् प्राध्यापक माथेमां ‘नारायणगोपालया मे– जीवनया हे अङ्ग जूगु’ धकाः धयादिल । वय्कलं ‘अंग्रेजि, हिन्दी, खय् भाय् व मेगु थी थी भाय्या मे न्यनेगु यानासां बहनी धाःसा नेपाली मे हे माःगु’ धकाः कनादिल ।
वय्कलं धयादिल– ‘ज्याज, क्लासिकल, रक सकतां विधा यः, अय्सां द्यनेगु इलय् धाःसा नेपाली मे हे न्यनेगु याना । थःम्हं गुगु भासं म्हगस म्हंका, उगु हे भाय्या मे न्यनेगु याना ।’ नारायणगोपालया बारे छगू बिस्कं सफू पिदंगु महत्वपूर्ण खँ जूगु धयागु तकं वय्कःया धापू खः । तथ्ययात वालाः मेहालामिया जीवनया बाखंयात कःघानाः सफू च्वयेगु धयागु थाकुगु ज्या खः धकाः प्राध्यापक माथेमां कनादिल। अथे हे मेच्वमि नगेन्द्र थापां सफूया खँय् धयादीगु दु– ‘गुबलय् थ्व सफुतिं न्ववाइ, उबलय् जि थः हे सुम्क च्वने ।’
अथे हे यानाः कलाकार सरोज खनालं नं नारायणगोपाललिसे नापलाःगुया लुमन्तिखँ न्यंकादीगु खः । सफूया च्वमि प्रकाश साय्मिं नारायणगोपालया सफलता, असफलता, मित्रता-दुस्मनीया लिसें न्हापा हे कनातःगु जीवनबाखं थौंकन्हय् पश्चिमी साहित्यय् च्वइगु कोलोडोरियन कन्सेप्टय् च्वयातयागु धकाः कनादिल ।
वय्कलं मेहालामि नारायणगोपालनिसें स्वरसम्राट नारायणगोपालया अवसान तकया पूवंक खँ तयाः सजीव किपाया कथं न्ह्यब्वयागु धकाः धयादिल । नारायणगोपालया खँय् चर्चा यानादिसे च्वमि साय्मिं धयादिल– ‘नेपाली संगीतया समग्र विकासया झ्वलय् नेपाली स्वर्णिम युगया अतुलनीय योगदान दु, थुगु हे युगय् मेहालामि नारायणगोपाल मेहालामि-संगीतकःमिया कथं दुहां झाल । वय्कलं नेपाली संगीतख्यःया लकसयात वाराक्वारा संकाबिल, वय्कःया मे हालेगु, सः व मेखँग्वः ल्ययेगु ज्यां नेपाःमि समाज तरङ्गित जुल ।’ सफू काठमाण्डौं पब्लिकेशनं पिथंगु खः ।
