नेपाल जापान ७० दँ कार्यक्रम समितिया ग्वसालय् यलया ग्वार्क्वय् म्हिगः ने.सं. ११४५ चिल्लागाः दसमि, सोमबारखुन्हु ललितपुर महानगरपालिकाया प्रमुख चिरिबाबु महर्जनजुया मूपाहांसुइ जापान देय्या फुजिनोमिया नगरपालिकाया मेयर हिदेताडा सुदोजुया लिसें झिंन्हय्म्ह जापानी सरकारी पुचःयात विदाइ ज्याझ्वः अले साहित्यकार रिता महर्जनया चिबाखं सफू ‘त्वःफ्यूगु स्वापू’या पितब्वज्या ज्याझ्वः जूगु दु ।
ज्याझ्वलय् यलया सच्छि व न्यादँ दुम्ह मन महर्जन अजियात ताःआयुया भिन्तुना बिसे हनापौ द्यछायाः हनेज्या नं जूगु खः । मेयरपिनि दथुइ थवंथवय् स्वापू क्वातुका वनेगु बिचाः प्वंकेगुया लिसें थी थी मतिचाया चिं लःल्हायेगु ज्या जूगु व नेपालभाषा चिबाखं साहित्यया पाखें संयोजक नरेश अमात्यं साहित्यकार रिता महर्जनयात भिंतुनापौ नं लःल्हाना दीगु खः । ज्याझ्वलय् फुजिनोमिया नगरपालिकाया मेयर हिदेताडा सुदोजु, यल महानगरपालिकाया मेयर चिरिबाबु महर्जन, पुलांम्ह राष्ट्रपतिया स्वकीय सचिव व जापानया निंतिं नेपाःया पुलांम्ह राजदूत मदन भट्टराई, मन्डनदेउपुर नगरपालिकाया उपमेयर विष्णुमणि नेपाल, फुजिनोमिया सिटिकाउन्सिलया नायः सुवाबे ताकातोशीया लिसें नेवाः हाइकु ख्यःया नायः सुरेश प्रधान, नेपालभाषा चिबाखं साहित्यया संयोजक नरेश अमात्य, नेवाः अभियन्ता व भाषाविद् पौभाः साय्मिपिन्सं नं थःथःपिनि नुगःखँ तयादीगु खः ।
ज्याझ्वःया सुरुइ ज्याझ्वःया संयोजक भाजु प्रो. नरेश महर्जनं लसकुस न्वचु तयादीगु खःसा नःत्वाः यलपाखें धिमे बाजं थानाः पाहांपिन्त लसकुस यायेगु ज्या जूगु खः । ज्याझ्वःया लिपतय् ग्वसाःखलःया पाखें साहित्यकार रिता महर्जनजुं सकसितं सुभाय् द्यछाया दीगु खः ।
