नेवाः ख्यलय् थःगु हे कथं मतापं ज्वः मदुगु योगदान यानाः मत्यवं मदया वंम्ह केमिकल इन्जिनीयर देवदास मानन्धरया योगदानयात लुमंकाः म्हिगः ने.सं. ११४५ बछलागाः द्वादसि, सनिबारखुन्हु ‘लक्ष्मीदास मानन्धर स्मृति प्रतिष्ठान’या पाखें येँय् ग्वसाः ग्वःगु छगू तःजिगु ज्याझ्वःया दथुइ मूपाहां मल्ल के. सुन्दर, पाहांपिं भिक्षु धर्मगुप्त महास्थविर, केशावति गुरुमां, साहित्यकार हितकर वीरसिंह कसाः, प्रा.डा. त्रिरत्न मानन्धर, पुथिया सम्पादक विष्णु चित्रकारपिन्सं ‘देवदास मानन्धर लुमन्ति पुथि’ व वय्कलं हे च्वयादीगु ‘देव बाखं मुना’ सफूया मंकाःकथं पितब्वज्या यानादिल । थुकी वय्कःलिसे सत्तीपिं थीथी १६० म्ह स्वयां अप्वःसिनं वय्कःया योगदानयात कयाः थःथःपिनि लुमन्तिखँ च्वयातःगु जुल ।
लक्ष्मीदास मानन्धर स्मृति प्रतिष्ठानया नायः भाजु नारायणदास मानन्धरया नायःसुइ न्ह्याःगु उगु तःजिगु पितब्वज्या ज्याझ्वलय् नेवाः न्ह्यलुवाः व नेपालभाषा एकेडेमिया चान्सलर भाजु मल्ल के. सुन्दरजुं मूपाहांकथं ब्वति कयादिसें थःगु नुगःखँ तयेगु झ्वलय् मदुम्ह देवदास मानन्धर लिसेया थीथी पुलांगु लुमन्ति खँ कनादीगु खः । अथे हे लुमन्ति पुथिया सम्पादक भाजु विष्णु चित्रकार, इतिहासविद् प्रा. डा. त्रिरत्न मानन्धरपिन्सं नं थःथःपिनि नुगःखँ तयादीगु दु । ज्याझ्वलय् लुमन्ति पुथिया च्वमिपिन्त सुभाय् पौ / मतिनाचिं द्यछायेगुया लिसें विशेष ग्वाहालिमिपिं खुम्हेसित लुमन्तिचिंकथं भगवानद्यः नं लःल्हाःगु खः । ज्याझ्वलय् मदुम्ह देवदास मानन्धरया अमेरिकाय् च्वनाच्वंम्ह म्ह्याय्छय् भाजु न्हूजः मानन्धरं यइपुगु नेवाःभासं थः बाज्याया लुमन्ति खँ नं तयेगु ज्या जूगु जुल ।
ज्याझ्वःया सुरुइ झीगु तजिलजिकथंया खिं थायेगु ज्या जूगु व मदुम्ह देवदास मानन्धरया जहान अले प्रतिष्ठानया न्वकू मय्जु सरोज मानन्धरं थः जहानलिसे स्वानाच्वंगु थीथी खँ कुलादिसे ज्याझ्वलय् झायादीपिं सकसितं लसकुस व ज्याझ्वः ताःलाकेत ग्वाहालि यानादीपिन्त सुभाय् नं बियादीगु खः । ज्याझ्वलय् मदुम्ह देवदास मानन्धरयात लुमंकाः छगू मिनेट मौनधारण यासें पाहांपिं व छेँजःपिनिपाखें देवदासया किपाय् श्रद्धास्वां दयछायेगु ज्या नं जूगु खः ।
ज्याझ्वःया लिपतय् लोककवि राजभाइ जकःमिजुं मदुम्ह देवदास मानन्धरजुयात लुमंकाः यइपुगु भासं लसय् हंक चिनाखँ नं ब्वनाः न्यंकादीगु जुल ।
