पेशागत रुपमा केमिकल इन्जिनियरलिसें उद्योगी देवदास मानन्धर दाइ नेपालभाषा ख्यःया बहु विधालय् समर्पित व्यक्तित्व खः। वयकलं नेपाल लिपिया संरक्षण, लिप्यन्तरणया सफ्टवेयर निर्माण, नेपाल लिपियात युनिकोडय् दुथ्याकेगु ज्या, दाफा भजन व सांस्कृतिक बाजं संरक्षण, नखःचखया भिडियो निर्माण, नेपाल संवतया क्यालेन्डर पिथनेगु, मानन्धर समुदायया आनुवंशिक अनुसन्धानया लागि हिंया नमूना संकलनय् ग्वाहालि, मानन्धर समुदायया जनगणना कायेगु, नेपालभाषा शिक्षा, नेवाः अधिकार, बौद्ध धर्म र बौद्ध शिक्षा, कृषि उत्पादन नापं आर्थिक क्रान्तिइ लगायतया आपालं ख्यलय् थःगु जीवनया मूवंगु ई बियादीगु खः।
जिगु रेडियो पत्रकारीता २०५२ सालनिसेंया न्हयागु जुसाः नं जिं वय्कयात उज्यालो रेडियो नटवर्कया नेपालभाषाया ज्याझवः लहनाय् संलग्न जुइधुक्का तिनी म्हसिउगु खः।
लहना ज्याझव २०६३ साल निसें न्हिया न्हिथं सुथसिया १० ताई निसें ११ ताई तक नेवा सरोकारया विषययात जनमानसय् यंकेगु तातुना शुरु जूगु खः। अबलें लहना ज्याझवः संचालन जि नापं सहकर्मी पासापिं राजेन्द्र शाक्य व लक्ष्मी शाक्यं यानाच्वनादीगु खः। थ्वहे झ्वलय् देवदास दाइं नंंंं समीर कर्माचार्य, विष्णु चित्रकार व ज्योतिष देवनारायण महर्जनं मिले जुया तिथियात दिं थें ल्याः खानाः नेपालसम्वतया क्यालेन्डर पिकायेत तयारी यानाच्वनादीगु खँ सहकर्मी पासाः राजेन्द्र शाक्यं न्ह्यथनादिल। वय्कया हे मार्फत लहना ज्याझवलय् देवदास दाइलिसें नेपालसम्वतया क्यालेन्डरया विषयलय् अन्तरवार्ता कायेगु ज्या जुगु खः। अबलें देवदास दाइ नं उज्यालो रेडियो नेटवर्कया विज्ञापन क्यालेन्डरय् तयेत इनाप यानादीगु खः ।
जिं उज्यालोया अध्यक्ष गोपाल गुरागाईजुयात इनाप याना क्यालेन्डरय् उज्यालोया विज्ञापन तयेगु वातावरण दयेका बियागु खः। खँय्तला यक्व याना मिडियातय्गु विज्ञापन बार्टर सिस्टमय् जुइगु जुसाः नं देवदास दाइया ज्यां समाजय् बांलागु लिच्व लाइगु ताया हे जुइमा उज्यालोया अध्यक्षजुं बार्टर सिस्टमय् मजुसें आर्थिक रुपं हे विज्ञापन तयेत उजं बियादीगु खः। अनंलिपा देवदास दाइ नं यानाच्वनादीगु यक्व ज्याय् गथेकि लिप्यन्तरण सफ्टवेयर निर्माण, नेपाल लिपियात युनिकोडय् दुथ्याकेगु ज्या, मानन्धर समुदायया आनुवंशिक अनुसन्धानया लागि हिया नमूना संकलन लगायतय् जिमिसं समाचार लिसें अन्तरवार्ता कायेगु ज्या यानाः। विशेष याना सहकर्मी पासा राजेन्द्र शाक्यया समिर कर्माचार्यजुलिसें बालांगु स्वापू दुगुलिइ लिप्यन्तरण सफ्टवेयर, नेपाल लिपियात युनिकोडय् दुथ्याकेगु ज्याया छगु छगु अपडेटया समाचार राजेन्द्र शाक्यजु च्वयादिगु खः।
रेडियो अन्तरवार्ताया लागि सतेबलय् देवदासं दाइ नं गबलें म्हा धयामदिइ। न्ह्यागु न्हयसःया लिसः अपुक व फुक्कसिया थुइक बियादीइ फुगु वयकयाके क्षमता दुगु खः। उज्यालो रेडियो नेटवर्कया लहना ज्याझ्वःया लागि जिं गुलि नं अन्तरवार्ता कयागु दु यक्व धइथें अन्तरवार्ताया अभिलेखिकरण जिगु ब्लगस्पट www.lahana90.blogspot.com य् जुयाच्वंगु दु। तर देवदास दाइलिसें कयागु अन्तरवार्तात यक्व हे न्ह्य कयागु जुगुलिइ उकिया अर्काइभ जिगु ब्लगस्पट मदु। थुकि जित तसकं दुखः ताः। यदि वयकलिसेंया अन्तरवार्ताया अर्काइभ जिगु ब्लगस्पटय् दुगु खसाः वयकः जिगु ब्लगस्पटय् नं न्ह्याबले दयाच्वनिगु खः।
आः वयक झी दथुइ मदु तर वयकलं यानादीगु योगदान, जीवनदर्शन, वयकलं बियादीगु प्रेरणाया खँत न्ह्याबले हे झी दथुइ म्वानाच्वनिइ। वयकःप्रति श्रद्घा सुमन।
