ने.सं. ११४६ दिल्लागाः तृतिया, सनिबार (२०२६ अगस्ट १)खुन्हु जूमपाखें जूगु संस्थाया न्हय्क्वःगु दँमुंज्या व न्याक्वःगु ल्यज्यापाखें नकिं श्रुति अमात्यया लिसें न्हूगु ज्यासना पुचःया ल्यज्या जूगु दु । नेवाः नखः न्यूयोर्कया नायः डा. नरेश मान शाक्यया नायःसुइ दंमुंज्या जूगु खःसा मूछ्यान्जे तुलसि नारायण चित्रकारं न्ह्याझ्वः न्ह्याकादीगु खः । ज्याझ्वलय् न्हापांम्ह न्वकुलि श्रुति अमात्यं लसकुस यानादीगु खः ।
ज्याझ्वलय् नीस्वनामि न्वकू, पुलांम्ह नायः व सल्लाहकार विष्णुमान प्रधानं नेवाः नखः न्यूयोर्कया पलिस्था, थुकिया आज्जु, महत्त्व व इतिहासया खँय् कुलादिसे संस्थायात अझ बांलाक व सुथांलाक्क न्ह्यज्याकेत सकल दुजःपिं छप्पँ छधी जुयाः थःथवय् जायेमाःगुली बः बियादिसे भिन्तुना बियादीगु खः । थुगु ज्याझ्वलय् ब्वति कयादीपिं सकल दुजःपिन्सं थःथःपिनि म्हसीका बियादिसे भिन्तुना बियादीगु खः । दंमुंज्याया खुल्ला सत्रय् मूछ्यान्जे तुलसि नारायण चित्रकारं संस्थाया लिपांगु निदँया कार्य प्रगति व थीथी गतिविधित न्ह्यब्वयादीगु दु ।
अथे हे दांभरिं सलोनि वन्त श्रेष्ठं आर्थिक प्रतिवेदन न्ह्यब्वया दीगु व निगुलिं प्रतिवेदन दँमुंज्यां अनुमोदन जूगु खः । बन्द सत्रय् निर्वाचन आयुक्त (पुलांम्ह नायः व सल्लाहकार) महेन्द्र वीर वज्राचार्यया कजिसुइ न्याक्वःगु ल्यज्या विधिवत् क्वचाःगु जुल ।
ल्यज्यापाखें क्वय् बिया कथंया ज्यासना पुचः निर्विरोध ल्यज्या जूगु दु– नकिं– श्रुति अमात्य न्हापांम्ह न्वकू– तुलसि नारायण चित्रकार ल्यू न्वकू– राधिका कुमारी श्रेष्ठ मूछ्यान्जे– सलोनी वन्त श्रेष्ठ दांभरिं– मेनी श्रेष्ठ छ्वचुं ल्यू दांभरिं– उजिला प्रधान दुजःपिं– दिपक कुमार प्रधान, नम्रता प्रधान, किरण कुमार रञ्जित, मोहिनी कर्माचार्य, अनिता बज्राचार्य, जीवेन्द्र भक्त प्रधानाङ्ग व रमेश चन्द्र चित्रकार निर्वाचन आयुक्त महेन्द्र वीर बज्राचार्यं न्हू ल्यःपिं पदाधिकारि व दुजःपिन्त सपथ ग्रहण याकादिसे सफल कार्यकालया निंतिं भिन्तुना नं बियादीगु खः ।
बन्द सत्रय् नायः डा. नरेश मान शाक्यं न्हूगु ज्यासना पुचःयात सफल कार्यकालया निंतिं भिन्तुना बियादीगुया लिसें थःगु कार्यकालय् संस्थाया थीथी ज्याझ्वलय् ग्वाहालि यानादीपिं सकल दुजः, संघ संस्था, मिसा मिजं स्वयं सेवक व ग्वाहालिमिपिन्त दुनुगःया सुभाय् नं बियादीगु खः । न्हूम्ह नकिं श्रुति अमात्यं थःगु नुगःखँ तयेगु झ्वलय् नेवाःभाय्, कला, तजिलजि, परम्परा व संस्कारया संरक्षण व प्रवर्द्धन यानाः न्हू पुस्ताय् थुकिया पुस्तान्तरणयात बः बीगु खँ कनादिल ।
वय्कलं सकल समुदायलिसे जानाः दुजःपिन्त तकं लाभान्वित जुइगु थीथी ज्याझ्वःत न्ह्याकाः संस्थायात अझ धिसिलाक्क न्ह्याका यंकेगु प्रतिवद्धता प्वंकादिल । लिसे, वय्कलं ल्यज्या व दँमुंज्याय् ब्वति कयादियाः ग्वाहालि व समर्थन यानादीपिं सकल दुजःपिन्त सुभाय् नं द्यछाया दीगु खः । नेवाः नखः न्यूयोर्क– नेवाः परम्परा, भाय्, कला व तजिलजिया संरक्षण, प्रवर्द्धन व न्हू पुस्ताय् पुस्तान्तरण यायेगु आज्जु ज्वनाः सन् २०११ स न्यूयोर्कय् पलिस्था जूगु संस्था खः । संस्थां पलिस्था इलंनिसें हे नेवाः समुदायया हित व कला संस्कृतिया संरक्षणया निंतिं थीथी ज्याझ्वःत न्ह्याकावं वयाच्वंगु दु ।
