नेवाः संस्कृतिया छगू महत्वपूर्ण ब्व बाजं संस्कृति नं खः। गुंला ज्वःछि लच्छितक थी थी बाजं खलःपिन्सं बाजं थानाः स्वयम्भू महाचैत्य चाःहिलाः लिहां वयेगु गुंंलापर्वया छगू महत्वपूर्ण ज्या खःसा थ्व हे कथं उदाय्तय् नं थःथःगु त्वालं गुंला बाजं थानाः स्वयम्भूइ गुंलाया लच्छियंक द्यइके वनेगु छगू धार्मिक, सांस्कृतिक ज्या जुया वयाच्वंगु दु ।
थ्व हे बाजं संस्कृतिया बारेय् जानकारी बीगु निंतिं उदाय् समाजं वइगु शनिबाः उदाय् गुंला बाजं ब्वज्या याइगु जूगु दु । म्हिगः जूगु पत्रकार सम्मेलनय् उदाय् म्यूजियमया ग्वसालय् निक्वःगु खुसी उदाय् गुंला बाजं ब्वज्या जुइगु जानकारी ब्यूगु दु । ब्वज्याया कजि डा. सुमन तुलाधरं ऐतिहासिक थाय् वसन्तपुरया दश अवतारया दबुली शनिबार बाजं ब्वज्या यायेगु जानकारी बियादीगु खः ।
उगु बाजं ब्वज्याय् असं बाजं गुथि, जनबहाः गुंला बाजं, कसाः तःधं गुथि, न्यत तुलाधर गुंला बाजं खलः, तेबहाः गुंला बाजं खलः, तवः गुंला बाजं खलः व स्थापित खलःपिन्सं थी थी तालया थःथःगु बाजं न्ह्यब्वइगु वय्कलं धयादिल । सांगीतिक सम्पदाकथं न्ह्यानाच्वंगु गुंला बाजंया मौलिक संस्कृतियात म्हसीका बीगु ल्याखं उदाय् समाजं ब्वज्या यायेत्यंगु धासें वय्कलं ब्वज्याय् उदाय्तयगु खुगू पुचलं ब्वति कयाः थी थी बोल व तालय् थःगु प्रतिभा न्ह्यब्वइगु धयादिल।
अथे हे वय्कलं गुगु पुचलं छु तालया बाजं थाइगु खः धैगु नं जानकारी बिसें उदाय् मिसापिन्सं नं थी थी तालया बाजं थानाः थःगु प्रतिभा न्ह्यब्वइगु व ब्वज्याया दथुइ दथुइ मनोरन्जनया निंतिं मे हायेकेगु ग्वसाः दुगु धयादिल। येँ महानगरपालिकाया उपप्रमुख सुनिता डंगोलया मूपाहांसुइ जुइगु बाजं ब्वज्याय् गुंलाबाजंया ब्रोसर नं पिथनेगु योजना दुगु वय्कलं पत्रकार सम्मेलनय् जानकारी बियादीगु खः।
सम्मेलनय् उदाय् समाजया नायः डा. रुपज्योति कसालं उदाय् समाजया बःचाधंगु म्हसीका बियादीगु खः। अथे हे न्यत तुलाधरया बाजंगुरुपिं पूर्ण रत्न तुलाधर व गौतम रत्न स्थापितं नं बाजंया थी थी पक्षयात कयाः जानकारी बियादीगु खः । उदाय् समाजया प्रचार छ्याञ्जे भवानी तुलाधरं न्ह्याकादीगु ज्याझ्वलय् उदाय् समाजया मूछ्याञ्जे रजनी ताम्राकारं सुभाय् न्वचू बियादीगु खः । थ्वया न्ह्यः नं उराय् समाजं न्हापांगु गुंला बाजं ब्वज्या हनुमानध्वाखाया हे महाद्यः पार्वती देगः क्वय्या दबुली याःगु खःसा अबलय् सच्छिगः धाः बाजं छक्वलं थानाः बाजं ब्वज्या याःगु खः ।
