नेवा: नख: न्यूयोर्कया न्याक्वःगु साधारण सभां डा. नरेश मान शाक्यया नेतृत्वय् न्हूगु ज्यासना पुच ल्यःगु दु। न्हूगु ज्यासना पुचलय् नायःलय् डा. नरेश मान शाक्य, न्हापाम्ह न्वकु श्रुति अमात्य, निम्हम्ह न्वकु महेन्द्र कुमार बज्राचार्य, मू छयाञ्जे तुलसी नारायण चित्रकार, छयाञ्जे अनित श्रेष्ठ, दाभरीं सलोनी वन्त श्रेष्ठ व ल्यू दाभरी मेनी श्रेष्ठ निर्विरोध निर्वाचित जुयादीगु खः।
ज्यासना पुचया दुजलय् दिपक कुमार प्रधान, नम्रता प्रधान, राधिका श्रेष्ठ, किरण कुमार रंजित, शोभना शाक्य, उजिला प्रधान, राजीव बाटाजु व सबिना शाक्य निर्विरोध जुयादीगु दु। १५ म्ह दुगु ज्यासना पुचलय् ८ म्ह मिसापिं निर्वाचित जूगु खः ।
सभां पूलाम्ह नायःलिसें सल्लाहाकार विष्णु मान प्रधान व निवर्तमान नायः महेन्द्र बीर बज्राचार्ययात सल्लाहाकारय् मनोनीत याःगु खः। नेवा: नख: न्यूयोर्कया प्यक्वःगु निर्वाचन, निर्वाचन आयुक्त विष्णु मान प्रधानं पूवंकादीगु खः।
थ्वया न्हय् जुमया माध्यमं जूगु साधारण सभा नख: या नायः महेन्द्र बीर बज्राचार्यया नाय्स्वीइ व पूलांम्ह नायःलिसें सल्लाहाकार विष्णु मान प्रधानया मूपाहाँस्वीइ जूगु खः। मूछयाञ्जें तुलसी नारायण चित्रकारं न्ह्याकादीगु साधारण सभाय् न्हापाम्ह न्वकु डा. नरेश मान शाक्यं लसकुस न्वचु बियादीगु खः।
सल्लाहाकार विष्णु मान प्रधानं नेवाः नखः न्युयोर्कया स्थापना, थुकिया महत्त्व व इतिहासया बारेय् नवानादीगु खः। वय्कलं “Teamwork Makes A Dream Work” धासें फुक्कं दुजत जानाः संस्थायात अझ बालाक्क न्ह्याकेमाःगुलिइ बः बियादिल।
अथेहे निम्हम्ह न्वकु श्रुति अमात्यं नखःया ज्याखँया बारेय् जानकारी बिसें न्हू पुस्तायात नं कघायाः नेवाः संस्कार व संस्कृति सना यंकेमाःगुलिं बः बियादिल।
ज्याझ्वः न्हय् सभाय् ब्वति कापिं दुजःतयगु दर्ता यायेगु ज्या छयाञ्जें अनित श्रेष्ठ व ल्यू दाभरीं मेनी श्रेष्ठं यानादीगु खः।
मूछयाञ्जें तुलसी नारायण चित्रकारं संस्थाया निदँया कार्यप्रगति विवरण व संस्थाया गतिविधी न्ह्यब्वयादीगु खः । दाभरीं सलोनी वन्त श्रेष्ठं आर्थिक प्रतिवेदन पेश यानादीगु खः।
सभाय् न्हापाम्ह न्वकु डा. नरेश मान शाक्यया मदुम्ह अबुजु कर्ण मान शाक्यया लुमन्तिइ छगु मिनेट मौन धारणा यानाः वय्कया आत्माया चिरशान्तिया कामना यानाः श्रद्धांजली देछागु खः।
नेवा: परम्परा, कला व संस्कृतिया संरक्षण, प्रवर्द्धन व न्हूगु पुस्ताय् पुस्तान्तरणया लागि सन् २०११ य् न्युयोर्कय् पलिस्था जूगु नेवा: नख: न्यूयोर्कं समुदायया हितया लागि थीथी ज्याझ्वः यानावयाच्वंगु दु।
